Punda,– E plan pa garantisá un preis atraktivo di alimentashon i garantisá aksesibidat di kuminda, no tin fondo aloká den e promé konsepto di e presupuesto den 2024.

For di promé ku covid-19 Ministerio di Desaroyo Ekonómiko(MEO) i Ministerio di GMN tabata primi pa oumentá garantia di alimentashon (Food Security) na Kòrsou. E problemátiko di garantia di alimentashon a bira mas evidente durante e pandemia di Covid-19. Durante e pandemia,  problema di logístika a sòru ku vários kuminda, kombustibel i alimentashon a bira skars. E skarsedat a finalisá ku produktonan básiko a oumentá di preis na nivel impagabel pa personanan ku ya ta kana ku problemanan nan finansiero.

Pa kombatí e oumento di preis di alimantashon, konseho di minister a aprobá e plan pa garantisá seguridat di alimentashon i mantené preisnan stabil na Kòrsou. E proyekto a kuminsá den 2023 i lo sigui kana den 2024. Apesar di e plan pa sigui ehekutá e proyekto ku a keda aprobá den konseho di minister, gobièrnu no a apuntá fondo pa ehekutá e plan.

Algun trabou ku di e plan ta inkluí: establesé i mantené un base di dato di kunukeronan, outomatisá e petishon pa dispensashon uzando e sistema di “Nos Kosecha”, i utilisá donfonan dispunibel via Qredits.

Banda di e proyekto ariba menshoná, ministerio di GMN a produsí plan Barika Yen Kòrsou Kontentu”. E meta di e plan aki ta pa krese sektor agrikultor te ku 5% di produkto bruto nashonal pa 2030. Ámbos proyekto ta dirigí spesífikamente for di un enfoke ekonómiko pa mitigá divisa di sali pais  i stimulá empresarionan lokal pa produsí mas fruta i bèrdura.

Pa ehekushon di e proyekto piloto tin un suma di 300 mil florin asigná, pero esaki no por a wòrdu haña bèk den e promé konsepto di presupuesto gubernamental 2024.