Segun Ministerio Públiko no tin niun problema pa Fiskal Schoop por duna lès.

Willemstad,– Ministerio Públiko a tuma nota di mensahenan riba medionan (sosial) ku ta sugerí ku un fiskal no ta íntegro pa motibu ku e ta duna lès na sierto instituto di formashon.

Pa e motibu aki tin sierto investigashon ku no por keda realisá. Di un manera general ta indiká ku den un estado di derecho demokrátiko no ta kuadra ku magistradonan (hues i fiskalnan) ta duna lès na un instituto di formashon i/òf universidat. E sugerensianan aki ta kompletamente inkorekto; e investigashon ku ta referí na dje den un di e mensahenan ta den “full swing”. Konforme Lei di Reino di Ministerio Públiko di Kòrsou i di Sint Maarten i di Boneiru, Saba i Sint Eustatius, miembronan di Ministerio Públiko, entre nan tambe fiskalnan, por ehersé aktividatnan adishonal basta  e aktividatnan aki no trese un konflikto di interes. Konforme e lei di Reino di Ministerio Públiko, anualmente, kada fiskal ta indiká kiko nan aktividatnan adishonal ta i Ministerio Públiko ta evaluá si e aktividatnan aki ta permití òf no. Ta fail e aktividatnan adishonal den un registro.

E fiskal menshoná tambe ta deklará su aktividatnan anualmente. Den pasado, pa vários aña, el a duna lès pa sinku anochi anualmente na un instituto di edukashon spesífiko. Niun di e aktividatnan aki a òf ta ser konsiderá komo konflikto di interes. No ta konsiderá dunamentu di kòlezje na universidat òf na otro instituto (di edukashon) komo un ‘conflict of interest’. No solamente den e parti Karibense di Reino, pero tambe na Hulanda i na Merka, huesnan, abogadonan i fiskalnan ta duna lès na institutonan di edukashon avansá i universidatnan. Hustamente pasobra ta konserní personanan ku ta traha den e ámbito hurídiko, institutonan di edukashon ta konsiderá ku tin un balor agregá pa laga nan duna kòlezje, mirando ku e dosentenan aki no ta solamente traspasá konosementu teorétiko, pero tambe for di práktika.