HULANDA,—-Tabata ayera ku Vigilante Farándula a hiba un kombersashon ku e ‘roadmanager’ di agrupashon musikal Buleria, kende ta Nicole Martina, kaminda ku e tópiko tabata rondó di e músiko Glennrick Curie. Un ke otro pa sa ku si lo e move for di e banda si òf no, manera rumornan ta indiká.

Ta asina ku Vigilante Farándula a puntra Nicole ku si el a kuminsá pensa kaba riba un músiko nobo i den kua direkshon e ta bai buska esaki. Nicole a duna di konosé lo siguiente:

“Abo si no ta duna niun hende un blo, manera ku bo tende di e palabra moveshon bo ta kuminsá bèl. Pa awe so mi a mira kon fèrfelu bo ta ku bo yamadanan. Di bèrdat bo ta un persona ku no ta entregá den bo trabou. Loke ku mi por bisa bo ta ku nos ya bai buska un perkushonista yòn. Esei so mi por bisa bo pa awor aki. No puntra mi nada mas, paso mi no ta bai bisa bo nada mas”.

Mas aleu Vigilante Farándula a yama Jairo Evertsz tambe, kende ta un di e fundadónan di agrupashon musikal Buleria i a bisa Jario di e informashon en kuestion. Pero Jario a bisa: “Bo tin ku papia ku Nicole. E ta e ‘roadmanager’ di Buleria i por bisa bo mas kos. Òf drenta riba Dwight, paso awor ami ta den un ambiente aki i mi no por bisa bo nada.

Vigilante Farándula a drenta den kontakto ku Dwight Leoneta. Ta asina ku Dwight a kontestá su telefòn, pero el a duna di konosé ku e ta den studio di grabashon i si por yama Nicole.

Esaki ta loke ku Vigilante Farándula a hasi promé ku a drenta den kontakto ku Jairo i Dwight. Vigilante Farándula sigur lo bai sigui e desaroyo aki ku wowo di falki. No mester lubidá ku Buleria tin presentashon na Kòrsou na luna di sèptèmber benidero i seguidamente na òktober nan tin ku bolbe bai presentá na Hulanda.