Agard durante entrevista na Hato

Hato—E velosista kampeon mundial 4×400 meter estafèt, Terrence Agard tambe ta na Kòrsou den kuadro nan preparashon pa e siguiente kampeonato mundial di estafèt na Bahamas 4 i 5 di Mei próksimo. Agard, tin algun siman kaba na Kòrsou debí na motibunan familiar tabata na Hato djadumingu último pa yama e delegashon di Hulanda Bon Bini na Kòrsou.

Hulanda huntu ku paisnan Suisa, Bèlgika i Ukraina ta biniendo Kòrsou den kuadro di nan preparashon pa e siguiente kampeonato mundial na Bahamas. Den un entrevista kòrtiku Agard konfirmá nan partisipashon i bisa di ta sumamente kontentu di por trese e atletanan internashonal Kòrsou. E YDK kende a pasa su karera hubenil na Kòrsou bou di coaching di Wendell Prince, a bira miembro di selekshon hulandes despues di a muda pa Hulanda.

E ta formando parti di e selekshon di Hulanda kende ta aktual kampeon mundial den kompetensha di estafèt. Aña pasá na Boedapest nan tabata un stap for di e titulo di kampeonato mundial di atletismo, te na momento históriko ku Femke Bol su pia no a por a duna mas. “Nos ta manera un famia”, Agard a splika Vigilante riba e unidat den selekshon nashonal di Hulanda.

Na e momentonan aki e tambe ta na Kòrsou pa kuminsá prepará su mes pa e siguiente temporada di atletismo dilanti porta. Entre nan esun promé na Bahamas i despues riba e sirkulo oropeo buskando nan klasifikashon pa Weganan Olímpiko di Paris.