WILLEMSTAD – Ofisina di notario lokal Fung-A-Loi & Samander Notarissen B.V., no ta obligá pa paga e sobrá di herensia di un hòmber na su yu muhé ku ta biba na Hulanda. Tin indikashon ku e hòmber tin un otro yu muhé. Korte a disidí asina, ounke konforme nos Kódigo Sivil e término di 5 aña pa e otro yu muhé pidi konfirmashon hudisial di paternidat a pasa.

E dama bibá na Hulanda a entamá un huisio sumario kontra e ofisina di notario, eksigiendo e di dos parti di e herensia di su tata ku a fayesé na 2018. Sinembargo, e notario a rechasá pa paga e suma akí te ainda, pasó tin indikashonnan fuerte ku e tata posiblemente tin un otro yu muhé. E yu bibá na Hulanda a demandá pa Korte kondená e notario pa koperá ku e likidashon di d herensia i pa paga 150 mil florin na dje, òf mas òf ménos dje kantidat di plaka ku tin ainda na benefisio di e herensia di su tata, riba kuenta di terser dje notario.

El a argumentá ku su tata tabatin su último residensia na Kòrsou i el a fayesé akí. Esaki ta nifiká ku lei di Kòrsou ta apliká na e likidashon di e herensia. Segun nos Kódigo Sivil, kualke desishon ku ta establesé paternidat di e tata riba e otro yu muhé, no tin konsekuensianan ereditario mas. Basá riba esaki, e notario mester paga e parti restante di e herensia na dje. El a sigui argumentá ku otro yu muhé no por eksigí esaki, ni maske establesé paternidat despues tòg. I ku no ta importá ku e areglo akí no ta inkluí den e Kódigo Sivil hulandes (oropeo).

E notario na su turno a argumentá komo defensa ku na momentu di likidashon di herensia di e tata, e notario tin un deber di kuida interesnan. E konsehero di e otro yu muhé a aserká e ofisina di notario i a bisa ku e tambe ta yu di e hòmber. Segun e notario, no ta pèrmití pa paga henter herensia na e yu muhé na Hulanda ku e konosementu akí.

E hòmber a muri komo soltero sin yunan rekonosé. E pregunta fundamental den e kaso akí ta si e notario ta obligá pa paga e parti sobrá di e herensia na e yu muhé bibá na Hulanda, ku a entregá e demanda na Korte. E término di 5 aña despues di morto, manera stipulá den artíkulo 1:207a di nos Kódigo Sivil, a pasa. Sinembargo, e notario ta alegá ku tin indikashonnan fuerte ku e otro dama tambe ta yu di e hòmber. Porlotantu Korte a konkluí den e huisio sumario akí, ku no ta obligá e notario pa hasi e pago ainda, mirando ku ta kreibel ku e tata tin un otro yu muhé.

Ounke e término di 5 aña a pasa, no por ekskluí e posibilidat ku den un otro kaso sivil di e otro yu muhé Korte lo husga ku e apelashon di esun bibá na Hulanda riba e artíkulo menshoná di nos Kódigo Sivil, lo ta inaspetabel segun standarnan di ta rasonabel i husto. Korte ta konkluí ku e artíkulo menshoná den Kódigo Sivil ta inkluí den esaki ku bista riba seguridat hurídiko di biuda di un defuntu i otro yunan. Korte ta suprayá ku den e kaso akí no tin un situashon kaminda na morto di e hòmber tabatin biuda i yunan. E hòmber no a rekonosé ni e yu muhé na Hulanda ni e otro yu muhé, pero tin indikashonnan fuerte ku e tabata sa di nan eksistensia sí.

P’esei Korte ta konkluí ku e notario bèrdat por a tene kuenta ku posiblemente, den un kaso sivil ku e otro yu muhé ta embolbí, por konkluí ku ta inaspetabel ku esun na Hulanda por eksigí henter e herensia. Korte a rechasá e demandanan di e yu muhé na Hulanda. Esaki ta nifiká ku e notario no ta obligá na e momento akí pa paga e parti restante di e herensia na e yu muhé na Hulanda.