Maurits Rosalina a referí na Ministerio Públiko pa duna deklarashon.

Rio Canario—Apesar ku Ministerio Públiko no por duna konfirmashon, tin indikashonnan bastante konkreto ku un kargamentu di kokaina konfiská den Novèmber 2023, a bolbe disparsé bou wowo di outoridatnan kompetente. Despues di a bende un yate na  Novèmber último riba findishi, a bin deskubrí ku Ministerio Públiko a “release” un propiedat konfiská ku kokaina aden.

Ta trata di 200 kilo ku tabata den kiel di e boto Tara X. Segun Ministerio Públiko no sa kiko a sosodé ku e lote di droga miéntras Warda Kosta a deklará di e entrega e droga konfiská na polis. Bosero di Kuerpo di Polis sr. Maurits Rosalina tampoko no por duna splikashon unda e droga konfiská ta. Tei ta bastante konkreto ni Polis i tampoko Warda Kosta no sa paradero di e droga. Ayera, segun bosero di Ministerio Públiko, a laga destruí e droga.

Ta trata di un droga den forma di pasta, ku tabata den kiel di e yate konfiská Tara X. Ministerio Públiko a laga bende un Yate konfiská, sin a kaba di hasi e kontròlnan nesesario promé manda e boto riba benta na findishi. A bin resultá despues ku kumpradónan di e yate a bin deskubrí e “kil” di yate, yená ku kokaina.

Segun testigunan, hinter e paden di e kiel, tabata traha di kokaina. Esta yená kompletamente ku kokaina. E deskubrimentu a trese reakshonnan di spantu serka e kompania ku e kumpra e yate. Vigilante a drenta den kontakto na vários okashon ku bosero di Ministerio Públiko, Roderick Gouverneur kende na inisio no por a duna un reakshon. Segun Gouverneur, e no tabata por a risibí e informashon ofisial for di Warda Kosta. Tambe Vigilante a tuma kontakto ku mr. Guillano Schoop eks fiskal enkargá ku prensa kende ta den proseso pa bira Prokurador General. Schoop no a duna reakshon riba e insidente.  For di investigashon ku Vigilante a realisá a bin saka afó ku aki ta trata di un yate ku warda kosta a bin topa di un forma sospechoso ta drif na e parti sùit di Kòrsou. Tabata dia 22 di sèptèmber 2020 ku wardakosta via di nan sistema di radar a tuma nota di un boto no registrá tabata nabegá den awanan teritorial di Kòrsou. Wardakosta a bai mesora den direkshon di e boto di bela na unda a bin haña esaki ta drif sin un bandera pega riba dje pa sa di kual pais e ta prosedente. E tripulante abordo a splika ku e tin problema ku motor kual a pone ku e boto a drif drenta awanan teritorial di Kòrsou. Segun e tripulante- kapitan a sigui splika ku su ruta no ta pa Kòrsou. Pa hasi mas investigashon a tou e boto bai mara esaki na e pir di warda kosta na Parera. Einan hasiendo uso di kachó adiestrá di Duana a hole rònt di e boto na unda e kachónan a reakshoná na e tankinan di gasoil di e boto. Mesora a pone e personal di DGC  i tambe narkótika di e reakshon sospechoso di e  kachó den e boto.  Pa por a hasi investigashon mas profundo den e tankinan di gasoil mester a buska un kontratista pa laga esaki chupa tur e líkido esta gasoil ku tabatin yena den e tanki. Esaki a pone ku tabatin basta trabou pa hasi e tankinan bashí pa por a kontrolá den e tanki. Despues di a logra di hasi e tanki bashí a bin topa ku un kantidat di pakinan di droga bon seya ku tabatin den e fondo di e tankinan. Mesora a kuminsá ku e parti pa kòrtá e tankinan pa asina por a saka e kargamentu di droga. Miéntras tantu e kapitan a keda detené i a wòrdu prosesá den korte pa poseshon i tambe importashon di lote di kokaina.

Tabata riba djaweps 16 di Novèmber, ku Ministerio Públiko a tene un Destaho Públiko. E findishi a tuma lugá 10’or di mainta riba petishon di Ministerio Públiko pa medio di intervenshon di un dùrwarder. Riba e lista di propiedatnan mobil pa benta tabatin, seadoo, yate di bela, botonan deportivo habri ku motor, diferente boto di faiber i di palu tipo pionero ku motor òf sin motor. E findishi a tuma lugá na Base di Marina na Parera, riba e tereno konosí komo Pindakaas. E kondishonnan di benta tabata na esnan kende a bid mas tantu. kumpradónan mester a swaip mesora i piki nan koroto. Interesadonan tabata por a pasa wak e artíkulonan for di 8’or di mainta.

Un kompania ku ta “scrap” heru a opta pa kumpra e yate di bela. Algun siman pasa a kuminsá skrap e boto pa bende e heru. Grandi tabata sorpresa ku na momento a kuminsá kibra “kiel” di e yate, puiru blanku a kuminsá sali. Mesora e trahadónan a yama nan direktor, kende a yama Warda Kosta pa bin kue e droga bai kuné. Pero despues, no a tende nada mas di e hayasgo, lokual alabes ta lantando pregunta unda e droga a bai. Segun testigunan, Warda Kosta a yega i bai ku e droga. Ayera OM a konfirmá ku tin un prosès ferbal, unda a destruí e droga.  Mas den lat Ministerio Públiko a emití un komunikado ku tabata bisa lo siguiente: Na ana2017 e boto Tara X a sali for di Aruba rumbo pa Kòrsou i a wòrdu konfiská aki na Kòrsou despues ku informashon a drenta ku tabatin droga riba e boto. Durante di un investigashon a resultá ku e droga tabata bon skondí den un tanki di diesel di e boto. E droga a wòrdu konfiská i e boto tambe. E droga a keda destruí mesora. Dia 16 di novèmber 2023 e boto Tara X a wòrdu bende na findishi i dia 23 di novèmber 2023 despues kue  boto a wòrdu kòrtá pa wòrdu bende komo heru bieu a haña skondí den un kompartimentu den e boto su kil un kantidat di un supstansia manera un pasta ku a tèst positivo pa droga. E droga aki a wòrdu konfiská i a destruyé mesora.