Alcher Hodge lo keda detené pa e próksimo 2 aña i su detenshon lo wòrdu prolongá abase di su trayekto di rehabilitashon.

Nieuwe Haven,– Korte di apelashon a dikta riba djaweps 28 di sèptèmber ku e hóben nan ku a kometé un asesinato den Kaya Beròm no mester sinta un kastigu inkondishonal den prizòn. Segun e veredikto di apelashon, ámbos hóben ta kai bou di lei hubenil, pues nan tur dos lo risibí un kastigu di rehabilitashon.

Durante tratamentu di e kaso di asesinato den Kaya Beròm tabata tin un diskushon interesante entre e defensa di e akusadonan hóben i e Prokurador General. Apesar ku tabata tin rapòrtnan riba mesa pruebando ku ámbos akusado mester kai bou di lei penal hubenil, PG Tiggelaar a rekomendá pa korte mantené un kastigu inkondishonal den SDKK. Segun e PG, e posishon pa mantené kastigu largu di 16 aña ta debí ku e seriedat di e delitonan a keda probá i alabes tin problemanan práktiko pa ehekutá kastigu di rehabilitashon mirando e edat i e situashon di e hóben nan. Segun e PG, e instituto JJIC no ta adekuá pa ehekutá detenshon di e hóbennan Hodge i Nocento. Banda di e edat di e hóben nan, no tin e fasilidatnan spesialisá pa e detenshon dje hóben kaminda e insituto no tin ekapasidat nesesario pa yuda rehabilitá Nocento ku Hodge.

Aunke e diskushon di e PG tabata fuerte, korte a indiká ku e ta dikta ku tantu Nocento i Hodge mester kai bou di lei hubenil, pues ámbos hóben mester bai den e instituto spesial pa e hóben nan ku kometé delitonan penal(PIJ maatregel).

Segun e veredikto, al kontrario di pensamentu di e PG, korte ta di opinion ku e posibel problemanan pa operashonalisá e detenshon hubenil no ta di tal manera ku mester impidí e detenshon di rehabilitashon. Awor ku e personalidat di e akusado ta brinda sufisiente base pa apliká lei penal di hóben, no por konsiderá un kondena komo adulto adekuá.

Awor ku korte a dikta ku e hóben nan aki mester sinta nan kastigu den JJIC, ta importante pa analisá i sigui nan desaroyo atraves di tempu. Den e promé konsepto di e presupuesto 2024, Ministerio di Hustisia a indiká ku tin plan nan stratégiko riba mesa pa prevení i kombatí kriminalidat bou di hubentut. Ta trata tantu di e demografia di hóben entre 12 pa 18 aña ku e demografia di adultonan hóben entre 19 aña pa 40 aña. “For di sifranan di detenshon e ministerio di hustisia ya a konkluí ku si no intervení pa prevení i kombatí kriminalidat bou di e edatnan aki, e grupo aki lo sigui krese e próksimo aña nan.

Sinembargo, segun informashon disponibel, for di 2010 Kòrsou ta moviendo den direkshon pa prevení aktividat kriminal bou di hubentut.