Zeelandia,– Ayera klientenan di OMNI kende a partisipá na e kampaña di Shop, Save & Win a gana diferente produkto.

Ayera 12 or di mèrdia OMNI a tene nan promé rifa relashoná ku e kampaña Shop, Save & Win ku OMNI. Ta trata di un kampaña ku ta kore den henter luna di febrüari 2024. Durante e kampaña tur kliente ku hasi kompra na OMNI ta bini na remarke pa haña 30% riba diferente merkansia. Alabes na momentu ku e kliente kumpra mas ku ANG 499,- e kliente ta bini na remarke pa gana premio tur siman den e luna di e febrüari.

E premionan ta inkluí un sena romántiko pa 2 persona na Kunuku’s Sushi & More, un sena na Espetada House pa 2, un “lunch” pa 2 persona na Fusions den Salina i por último por gana 1 ticket pa bula na kualke destinashon di JetAir. Ademas, tur siman OMNI lo rifa diferente produkto elektróniko ku por inkluí tèblet, lèptòp, televishon, telefòn i hopi mas.

Den su prinsipio e rifa mester wòrdu tené tur djabièrnè riba 3 or di mèrdia, pero debí na e marcha di tiner, a opta pa tene e rifa 12 or di mèrdia.

Durante e rifa Eugene Valpoort a indiká ku e ta gradisí tur e partnernan ku a uni i pa asina hasi e kampaña aki posibel. Banda di Eugene Valpoort, Rashid Roberto a hinka man den e buzon, pero tabata Bhupesh Katri a duna di konosé ken a ganadónan tabata.

E prome ganadó di e rifa tabata Nancy Qeusta Trenidad kende a gana 100 florin di krédito ku por wòrdu usá na Optica Omni. E segundo ganadó tabata Dianara Leander kende tambe a gana 100 florin di krédito na Optica Omni. E terser ganadó kende ta Roel Martina a gana un sena pa dos persona na Espetada House.

Judith Martha kende a entregá su karchi di partispashon na Omni Zeelandia a gana e sena pa dos na restorant Fusion. E di sinku ganadó, kende a gana un sena di sushi na Kunuku’s Sushsi & More tabata Eldrich Manuel. E premio máksimo di dia tabata un tèblet di Samsung i a wòrdu ganá dor di J Ventura.

Na fin di e rifa, Eugene Valpoort a bolbe gradisí tur partner ku a djòin den e kampaña.