Un biaha mas a informá di un subida den kaso nan di violensia.

PORT-AU-PRINCE – E violensia na Haiti a eksperimentá un oumento di 8% entre luna di òktober i dezèmber di aña pasá, 2023. Esaki kompará ku e aña anterior, pa alkansá un total di mas ku 8.400 víktima for di luna di yanüari. Esaki segun informashon nan divulgá pa e Departamento di Derechi Humano di e Ofisina Integrá di Nashonnan Uni na Haiti.

E ekspanshon di violensia di parti gruponan kriminal a keda produsí partikularmente na e departamento di Artibonite i na e parti sùit di e kapital. Ta trata aki di un oumento di violensia seksual na vários munisipio.

E representante spesial di e sekretario general di ONU i kabesante di Binuh, Maria Isabel Salvador, a enfatisá ku e violensia aki ta kondusí na un inseguridat króniko, menasando e stabilidat i bienestar di siudadanonan.

E dokumento tambe a revelá ku e impakto riba menornan di edat, ku mas di 53 menor di edat víktima di violensia òf involukrá den aktividatnan kriminal, i ta destaká e opstákulo nan eksistente debí na kontrol di kayanan di parti gruponan armá.

Di otro banda, e teksto ta señalá ku e sistema hudisial, afektá pa violensia i problemanan struktural, ta mustra señal nan di mehoria ku medida nan pa redusí prizòn preventivo durante e periodo, den kua a sa di prosesá kaso nan ku a resultá den liberashon di mas ku 258 persona.

Debí na e situashon, e informe ta hasi un yamada na e komunidat internashonal pa mantené Haiti den agènda i respaldá e importansia di desplegá un mishon multinashonal di apoyo di seguridat, ku lo ta liderá pa Kenia i den kua lo tin partisipashon di forsa nan di Bahamas, Antigua, Barbuda i Jamaica, aunke ku entrada den akshon ta keda den suspenso.

E nota aki ta respaldá e kompromiso i determinashon di estado nan miembro di Nashon Uni pa manda un forsa internashonal pa Haiti, manera a keda pidí pa e promé minister haitiano, Ariel Henry, na òktober di 2022.