Segun a keda indiká, aunke e loke a keda mandá ta yuda, e no ta sufisiente.

HERUSALEM – E agensia humanitario di Nashonnan Uní, OCHA, a konfirmá den fin di siman tras di lomba, ku masoménos 20 trùk di kuminda, awa i remedi a drenta Gaza, kontrolá pa un grupo islamita Hamas, via di Rafah, na frontera ku Egipto.

E viserektor di e Ofisina di OCHA, na teritorio palestino, Andrea De Domenico, a indiká ku Krus Kòrá egipsio ta liderá e operashon di entrada di asistensia.

Esaki a atmití ku e yudansa lo no ta sufisiente pa palestino nan ku ta na Gaza, unda tin 2.3 mion di persona ta biba, di kua 1.4 mion ta personanan desplasá pa e bombardeo nan di Israel na e parti nort.

Di e banda egipsio di Rafah, boluntario nan a konta ku no tin entrada pa ambulansnan ni tampoko trùknan di kombustibel. Ademas a indiká ku e yudansa ta keda proporshoná via di Luna Kòrá di Egiptp i ONGs ku ta forma parti di e koalishon gubernamental Alianza Nacional pa Desaroyo Sivil.

E paso di Rafah, na sùit di Gaza i na límite ku Egipto, ta e úniko salida na eksterior, ya ku e restu di e paso nan fronteriso ta esun nan ku Israel.

E kruse ta será for di inisio di e kampaña di bombardeo di Israel, komo represaya pa e atake di Hamas, kontra e suela israelí dia 7 di òktober Último. Esaki a laga saldo di 1.400 morto i mas di 200 persona sekuestrá ku a keda hibá pa Gaza.