Back to Top
Vigilante banner image

Oportunidat úniko pa siña fishi di piskadó i merkadera


June 24, 2021 • 2 minüt pa lesa

Willemstad 23 di Yüni 2021- Federashon Kooperativanan Uní di Produkshon (KUP) den koperashon ku Institute Professional Excellence (IPE), ta bai organisa un kurso pa piskadó i merkadera.  Meta di e kurso ta pa eduká i konsientísa kursistanan pa ku kuido di piská, garantisando piská di kalidat haltu den nos tur su tayó.  E kurso ta kuminsa dia 28 di yüni proksimo.  E ta konsisti di 11 seshon, ta tuma luga na Klein Kwartier #33 (antes LVV) di 7 or pa 9 or di anochi.  Interesadonan por inskribi via email na federashonkup@gmail.com òf yama telefòn 5193215 i/òf 5153252 promé ku dia 27 di yüni 2021.  Di e forma aki IPE, den koperashon ku KUP, ta kontribuí na krea mas oportunidat pa trabou den un area ku ta sirbi bienestar i salú di nos komunidat. 

E kurso aki ta pa piskadó, merkadera i tur persona ku ta desea na amplia nan konosementu kon pa atende ku piská for di momentu ku e wòrdu piská te na momentu ku e piská ser entregá na e kliente.  Kursistanan lo amplia nan konosementu riba entre otro:

  • Desaroyo personal (siña konose bo mes, asumi responsabilidat i un parti di EHBO den e area);
  • Higiena i kuido di piská (kuido di piská riba laman, limpia i konserva piská durante di bentá, etc.);
  • Maneho di empresa chikí (siña i haña tep kon maneha un empresa pa chikí ku e por ta, kosnan basiko di administrashon, etc.).

E invershon eksiguídi e kursistanan ta nan disponibilidat i interes genuino pa siña kon bira un bon piskado òf merkadera mientras kosto relashoná ku e kurso ta keda kubri pa IPE.

IPE ta inisiativa di Bureau Telecommunicatie en Post, Aqualectra, SOAB, i CHATA. IPE ta un paso lógiko ku a surgi for di un di e pilánan importante di e esfuerso mayó pa desaroyá Kòrsou den un “SmartNation”. IPE su funshon ta pa realisá programanan dirigí riba re-ekipá profeshonalnan di entidatnan ku ta partisipá, i demas suministradó di servisio i tambe otro profeshonalnan den nos komunidat pa djòpnan di futuro. Ya kaba IPE a kapasitá un gran kantidat di profeshonal den e area di agrikultura modèrnu, IT i resientemente den konfekshon di produkshon masal (uniform.)

Ta hasi bon uso di e sinergía, manera den e kaso aki ku KUP, pa asina un grupo mas grandi den nos komunidat por probechá i prepará nan mes pa tin un bienestar atraves di e djòpnan nobo ku ta presentando nan mes. IPE ta ofresé programanan di rekapasitashon i optimalisashon di konosementu riba tur nivel pa optimalisá abilidatnan spesífiko importante pa prepará e profeshonal pa e djòp di futuro.  Pa mas informashon por manda un e-mail na info@ipe.cw.

Login