Den luna di yüli tras di lomba a nota otro subida den kasonan registrá.

PORT-AU-PRINCE – E violensia na Haiti a registrá un subida den e terser trimèster di aña i solamente den luna di yüli a registrá 83 sekuestro. Esaki segun a keda indiká pa ONG Unidat di Vigilansia di Delinkuensia di Sentro di Análisis i Investigashon di Derechinan Humano.

Den un informe, e organisashon no gubernamental ku tin algun aña dokumentando aktonan deliktivo na Haiti, a indiká ku den luna di yanüari te ku e fecha aktual, tabatin 51 kaso di sekuestro di ekstranhero di kuater diferente pais.

E sekuestronan den luna di yüli, 23 den e zona di Bas – Artibonite, ta sugirí un oumento di violensia i otro aktividatnan relashoná ku gèng nan den e terser trimèster di aña.

Ademas, e violensia di e gèng di Vitelhomme Innocent na Tabarre, den serkania di e embahadanan di Estádos Unídos na Port-Au-Prince, a obligá 400 famia di sali for di nan bibiendanan. Esaki ademas a laga mas di 2.000 huida interno, di kua 229 ta menor di edat. Tur esaki segun datonan di e organisashon.

Entre e faktornan ku por splika, ta e subida di violensia ku ta debilitando e movementu di outodefensa komunitario Bwa Kale, kua ta gòlpia, mata i pega sospechosonan di gèng nan i esnan yegá na nan na kandela.

For di luna di aprel te ku dia di awe, e movementu aki a kousa mas di 200 víktima, segun e organisashonnan di defensa di derechi humano.

Otro faktor ku tambe lo por a kontribuí ta ku gruponan armá ta kometé sekuestro nan komo fuente di ingreso, spesialmente despues ku nan finansa a keda kòrtá ku un kantidat di sanshonnan imponé.

Haiti, unda gruponan armá ta kontrolá parti di e kapital i rondó di esaki, ta biba den un krísis i un spiral di violensia ku algun masakre, sekuestro i kimamentu di bibiendanan