Willemstad—-Djadumingu 20 di febrüari 2022 alrededor di 18.32’or, Sentral di Polis a risibí informashon di un aksidente basta serio ku a tuma lugá riba Caracasbaaiweg na altura di Janthiel.
Mesora a dirigí unidat polisial i ambulans na e sitio. For di investigashon preliminar a sali na kla ku un outo di famia tabata kore riba Caracasbaaiweg saliendo for di Caracasbaai bayendo den direkshon di Sorsaka. Na altura di Janthiel, pa motibunan te ainda deskonosí, e vehíkulo aki den kua tabatin tres okupante, a bai dal kontra di un palu di lus. Dos di e personanan a keda pegá den e vehíkulo i ku yudansa di polis i personanan den besindario, a logra saka nan for di e situashon ku nan tabata aden. Dos di e okupantenan a risibí kap na kara miéntras un otro a tabata keha di slanan interno i a risibí leshon na varios parti di su kurpa. Ku ambulans a transportá e tres personanan aki pa Sala di Emergensia di C.M.C. pa tratamentu médiko. Personal di Departamentu di Tráfiko a keda enkargá ku e investigashon.