Parera—Riba djabièrnè último un eskuadron di kòntròl a sali pa kontrolá un kantidat di establesimentu. Ta trata di unidatnan konsistiendo di Duana, UBW, GMN i Inspekshon Ekonómiko. E unidatnan a kore na diferente parti di Kòrsou unda a baha i hasi e kontròlnan nesesario.

No tabatin infrakshonnan serio, lokual ta indikativo ku propietarionan ta teniendo kuenta ku kòntròl di outoridat. En total, tabatin 4 establesimentu sin problema, miéntras 7 a risibi atvertensha. Lástimamente mester a sera un establesimentu pa falta di regla.

Na Weg Groot Sint Joris a duna atvertensha riba indikashon di preis i pa duna wiski na shot, kual no ta permití. Na Seru Pretu tambe un toko a risibi atvertensha pa indikashon di preis. Na Kaya Harmonia un establesimentu a risibi atvertensha pa pone fasilidat di sinta pa su klientenan. Na Koral Partir, mester a duna órden pa manda yunan di propietario menor di edat kas. Na Jan Boos na un grill, mester a sera e establesimentu debi ku no tabatin pèrmit di hür adekuá. Demas establesimentunan tambe a risibi atvertensha leve. En general tabata un kòntròl bastante trankil sin muchu problema. Lo tene mas kòntròl rutinario.