Minister Larmonie-Cecilia  huntu ku Minister Carola Schouten di Hulanda, i Minister Rocco Tjon di Aruba.

WILLEMSTAD, — Den kuadro di e ‘Vierlandenoverleg’ minister Larmonie- Cecilia a tene un reunion huntu ku sobra ministernan di asuntunan sosial i di labor. 

Den kuadro di ‘Vierlandenoverleg’  ku a tuma lugá djabièrnè dia 27 di òktober, tur minister responsabel pa asuntu sosial i labor di Reino òf nan representantenan a partisipá. Minister Rocco Tjon lo tabata e representante di Aruba. Minister Omar Ottley, di St. Maarten a partisipá digital. Minister Carola Schouten di Hulanda huntu ku su delegashon a representá e islanan di BES den e ‘Vierlanden-overleg’.
Minister Carola Schouten di Hulanda, a menshoná ku den e reunion a splika kon a traha e rapòrt pa asina por wak kon e mínimo sosial den Karibe Hulandes ta mustra. A tuma stapnan si pa asina realisá e mínimo sosial den Karibe Hulandes i esaki a keda trata den e ‘Vierlandenoverleg’ .  Minister Carola Schouten di Hulanda a menshoná ku kon kada pais ta hasi esaki ta keda na e paisnan mes.

Minister Rocco Tjon di Aruba, a menshoná ku di parti di Aruba kier a gradisí Kòrsou pa organisá e ‘Vierlandenoverleg’. Minister Rocco Tjon a menshoná ku hopi biaha den reino ta toka tópikonan finansiero pero e tópiko aki ta un di e tópikonan ku ta bai na e bienestar di siudadanonan di e pais. Minister Rocco Tjon a menshoná ku a mira e reunion komo unu hopi fruktífero pero te ainda no a sali afó kua pais lo organisá e sigiente reunion.

Minister Rocco Tjon di Aruba, a menshoná ku e reunion tin su balor agregante i ku hopi informashon importante a keda trese dilanti pa asina wak kon kada pais ta trata ku e temanan di bienestar sosial. Minister Rocco Tjon a bisa ku pa Aruba ta wak mitologia ku a wòrdu uza na Boneiru, pa asina midi pobresa i tambe e rekomendashonnan pa mitigá esaki. 

Minister Larmonie-Cecilia di Kòrsou, a menshoná ku a disidí pa tuma e promé paso den kaudro di e ‘Vierlandenoverleg’  riba e área sosial. Minister Larmonie-Cecilia a menshoná ku tin hopi diferensha den e aspekto sosial den Reino Hulandes. Minister a menshoná tambe ku e ta kere ku komo pais nos por siña hopi for di e otro paisnan i tambe traha ku otro. Minister a menshoná ku ta importante pa analisá kada situashon sosial di kada pais i asina yuda otro pa fortifiká manehonan ku ta benefisiá nos hendenan.

Minister Larmonie-Cecilia  a menshoná ku dia 3 di novèmber próksimo lo tin un konferensha ku Nibud na Kòrsou na kual ta bai hasi uzo di e ekspertía di Nibud pa asina traha un rapòrt pa Kòrsou tambe. Nibud ta un sentro independiente di konosementu i konseho tokante asuntu di finansa di kasnan di famia i ta yuda Hulanda ku eksportá i konosementu. Minister Rocco Tjon di Aruba a menshoná ku Aruba tambe ta interesá pa forma parti di e rapòrtnan ku Nibud ta traha. Minister Rocco Tjon di Aruba a menshoná ku Aruba tin hopi sifra kaba pero, ku e metodologia ku a keda uza na Boneiru ta hopi interesante i sigur di parti di Aruba ta interesá pa siña for di esaki.