Willemstad- Riba e ret sosial, Facebook, Parlamentario Giselle Mc William a lansa un komentario krítiko i a kuestioná e importansia ku e situashon di Covid tin pa Minister Presidente Gilmar ‘Pik’ Pisas.

Durante di e rueda di prensa, unda a anunsiá ku e medidanan kontra covid-19 lo wòrdu alargá, Minister Presidente Pisas no tabata presente pa anunsiá esaki. Segun Parlamentario Mc William, na su pareser, e ousensia di Minister Presidente Pisas tabata pa motibu di e biahe ku Pisas mester a realisá pa New York. Mc William ta sigui splika riba su Facebook, ku pa su gran sorpresa, Minister Presidente tabata na Kòrsou i tabata tin tempu mas atardi pa partisipá na un resepshon na Consul Merikano.  Giselle a puntra unda e rèspèt pa pueblo a keda, komo ku na su pareser Gobièrnu mes mester a anunsiá e medidanan ku nan a tuma i no manda un ámtenar pa hasi esaki.

Algun oranan despues por tuma nota ku e kolaborador di Minister Presidente Pisas, Roxienne Albertina Luidens, a reakshoná bou di e ‘post’ di Mc William. Den su komentario el a splika ku Minister Presidente ta kumpliendo ku pueblo dor di duna un relato ku kontinuidat riba e desaroyonan di Covid. Tambe Roxianne a agregá ku komo Minister di Hustisia, Señor Pisas mester a atendé ku algun situashon ku tabata rekerí su atenshon urgente den parti mainta i mèrdia. Segun Roxianne un bon lider sa di delegá trabou, sigur na momentu ku e sa ku esnan rondó di dje ta bon den loke nan ta hasi. Alabes, Roxianne a invitá Mc William pa e siguiente biaha ku e sinti falta di Minister Presidente, e por drenta den kontakto ku Roxianne pa asina keda debidamente informá.

Ta bon pa remarká ku ret sosial di Facebook ta mustra ku Parlamentario Mc William i Minister Presidente Pisas tin un amistat i na diferente okashon ta referí na otro komo “amigu”. Parlamentario Mc William ta un di e promé Parlamentarionan ku a felisitá Minister Pisas riba Facebook pa su viktoria den e elekshon polítiko último i nan tin diferente potrèt estilo ‘selfie’ saká huntu. Por a tuma nota di komentarionan di otro usuarionan di Facebook kuestionando e amistat entre Mc William i Pisas. Mc William a sa di reakshoná riba esakinan bisando ku mester separá amistat for di trabou.