Charetti America Fransisca ayera durante inougurashon di e reunion Ofensa den trato na periodistanan lokal na apertura parlatino

Piskadera–  Den seno di un grupo lokal di periodista, ta kuestioná aktitut di sra. Sharifa Bashir, Ofisial di Komunikashon Parlamento di Kòrsou. E reklamonan a bini despues ku Bashir,  a asumí un komportashon ménos apresiá den direkshon di un grupo di fotograf i periodista presente durante inougurashon reunionnan den komishonnan Parlatino, na Kòrsou.

Bashir, a ofendé sigur un fotograf lokal ayera, na momento e la bai kue un bòter di awa pa un kolega. Segun e fotograf, na momento e la bai kue e bòter di awa pa su kolega i tambe un glas di awa ku lamunchi, Bashir lo a duna komentario pa “stòp di kue kos kada biaha”. E fotograf en kestion, a splika e representante i eks kolega, ku ta “un bòter di awa mi a bin kue i basha un glas di awa ku lamunchi. Lokual a bin kai manera un sorpresa ta e hecho ku Bashir mes tabata esun kende a manda un invitashon pa prensa, riba 24 di aprel komo un rekordatorio pa asistí na e evento.

“Nos a sinti nos manera mucha”, un otro fotograf a duna di konos’é na Vigilante ayera. Na dado momento, debí na protokòl a restringí  trabou di prensa di tal índole, ku periodistanan lokal a sinti nan mes deskriminá. Lokual mas tantu a sakudí e situashon, ta momento ku “tata” di fotografnan lokal, Stanley Ignacio a bandoná e sitio, despues ku Bashir lo a limitá su akseso pa traha.

Segun Bashir ayera  na Vigilante, Ignacio a yega lat unda a splik’é ku su aksesibilidat no tabata sin límite i mester a tene su mes den restrikshonnan imponé pa e reglanan di kondukta Parlatino, pa lokual ta trata prensa. Bashir a splika di ta haña un lástima si tabatin reklamo, pero ta Parlatino ta pone e reglanan di kondukta pa prensa. E ofishal di komunikashon, kende tabata kolega di prensa, a bisa ku e no tabata por a duna eksepshon debí na e protokòl di Parlatino. Pa lokual ta trata e asuntu di awa, Bashir a bisa ku tabatin periodista tabata bishita e bufèt i despues bai kome pafó, lokual na dado momentu mester a trata na limitá esei. Mester bisa ku e rekordatorio riba e invitashon, no a menshoná ku tabatin reglanan imponé pa Parlatino.

Stanley Ignacio, kende ta e fotograf lokal ku mas eksperensha a bisa ku sra Bashir tabata simplemente arogante i instruí riba un tono “arogante” kiko por i kiko no tabata por. Ignacio, kende alabes tabata presidente di e organisashon di periodistanan lokal a keda bastante desepshoná ayera i opta pa baha bai laga e evento di Parlatino. Na dado momento segun Ignacio, fotografnan a opta pa bai sinta pafó i Bashir tabata esun kende a keda instruí ki ora por i ki ora no tabata por a saka foto. “Inaseptabel”, segun Ignacio.

Kosnan a bai asina leu, na momento tabatin e seremonia di firmamentu, Promé Minister Pik Pisas a nota ousensia di fotografnan lokal i mesora a para a firmamentu pa averiguá kiko tabata pasando. Al final, e aktitut di Bashir ayera a keda kuestioná pa su eks koleganan den prensa i hasta kalifiká e situashon komo unu diskriminatorio pa nan trabou den prensa liber.