Dia 25 aprel lo tin inougurashon di reunionnan di komishonnan figo di Parlatino, kual lo keda presentá tambe na komunidat pa asina komunidat por forma parti di diálogo i debate polítiko.

Willemstad, –Parlamento a trata algun gastunan di parlamento den reunion di Komishon Sentral. Esakinan ta entre otro gastu di transporte, biahe i estadia di parlamento.

Gibi Doran (MFK) a menshoná ku un gastu ku a hala su atenshon, i ku segun su opinion ta demasiado haltu ta gastu di transporte, biahe i estadia di parlamento. Esaki ta un suma di 500 mil florin i Doran ta bisa segun e esaki ta demasiado haltu i ta spera ku den futuro lo redusí e gastunan aki. Silvin Cijntje, sekretario general di Parlamento ta bisa ku aña pasá a paga dos parti di biahenan Parlatino dor ku mester a rekuperá lokualnan a keda atras dor di periodo di Covid. “Ta p’esei e montante aki tabata 109 mil i e aña aki a kuminsá paga e montantenan aki”, Silvin Cijntje ta bisa. E gol ta pa na 2025 bai bèk na e montante di 30 mil dòler pa aña kual ta 64.600 florin lokual ta gastunan normal pa Parlatino.

Michelangelo Martines (KEM) ta bisa ku mester bini ku un proposishon di lei pa asina evaluá ku biahe ta hasi òf nò, esaki pa skapá pais su sèn.  No ta tur biahenan ta biahenan pa bai, Martines ta bisa. E siman aki tin Parlatino na Kòrsou, Martines ta bisa. Segun e parlamenrtio a puntra ki dia parlatino ta na Kòrsou i no por a haña kontesta ta ki dia  esaki ta tuma luga. “Ora tin sèn riba kuenta e or’ei si sa”. Pues mester evaluá huntu kua biahenan tin balor agregá pa Kòrsou. Parlatino tin 12 komishon presidente di parlamento sra. Charetti America-Francisca ta bisa. Gwendell Mercelina (PNP) ta bisa ku Michelangelo Martines mes tabata forma parti di un di e komishonnan.

“Si sa kiko Parlatino at kome i biba, hamas lo bo ke aisla un komunidat ku ta mira e importansia di entre otro turismo, e pilar ekonómiko di Kòrsou” Mercelina ta bisa. Dia 25 di aprel lo tin inougurashon di reunionnan di komishonnan figo di Parlatino, kual lo keda presentá tambe na komunidat pa asina komunidat por forma parti di e diálogo i debate polítiko.