WILLEMSTAD – Ana Maria Pauletta ta hopi preokupá ku e alegashon ku gobièrnu a traha palabrashon den kuadro di e fushon di e entidatnan GVI, SSHC i AJJC, i keda sin kumpli ku esakinan. Den kuadro di esaki, el a hasi algun pregunta na Minister di Hustisia Shalten Hato.

Na aña 2019 Konseho di Ministernan a tuma e desishon pa kuminsá un trayekto di fushon di e fundashonnan Gezinsvoogdijinstelling (gVI), Slachtoffer Hulp Curaçao (SSHC) i Ambulante Justitiële en Jeugdzorg Curaçao (AJJC). Esaki pa alsa e efisiensia di funshonamentu i sigui mehorá e servisio. Finalmente aña pasá i e aña akí a konkretisá e funshon i a lanta ‘Uitvoeringsorganisatie Justitiële Zorg’. A tuma ofer e totalidat di personal i tambe parti di e materialnan dje fundashonnan. Resientemente Pauletta a tuma nota ku Korte a deklará e fundashon GVI fayit. Durante di tratamentu dje kaso a bin diferente punto dilanti.

Den su karta na Minister Hato, e Parlamentario pa frakshon di PAR ta splika di ta hopi preokupá ku e alegashon ku gobièrnu a traha palabrashon den kuadro di e funshon di e entidatnan GVI, SSHC i AJJC, i keda sin kumpli ku esakinan. “Ademas e fundashonnan akí a sirbi pais durante añanan i lo ta hopi lamentabel pa despues ku nan a koperá kompletamente ku e trayekto di fushon, ta laga nan pa nan kuenta.” El a hasi Hato un kantidat di 12 pregunta relashoná ku e tema. Na promé lugá e ke pa e Minister di Hustisia splika si e proseso ku gobièrnu a kana pa tuma e tareanan di AJJC, GVI i SSHC bèk a terminá kaba. I si a kumpli ku tur palabrashon i promesa hasí ku i na e personal dje fundashonnan akí.

“Ta bèrdat ku a pidi e fundashonnan pa komprometé nan mes pa paga sesantia? Ta bèrdat ku gobièrnu a primintí ku gobièrnu lo a karga e gastunan si akaso SVB no paga e sesantia, sabiendo ku e fundashonnan no tin e fondonan nesesario? A ‘follow-up’ kaba ku e personal òf e fundashonnan tokante pago di sesantia? ‘Opheffing’ dje fundashonnan tabata parti di e proseso akí? Of a hasi palabrashon ku e fundashonnan tokante esaki? Unda ta pará ku e proseso pa ‘hef op’ e fundashonnan? E abogao di GVI ta bisa ku gobièrnu a laga nan pa nan kuenta. Minister por splika kiko gobièrnu a hasi pa yuda e fundashonnan den e proseso di ‘opheffing’?”

Ademas Parlamentario Pauletta ke sa di Hato si e ta haña ku e manera ku mester a pidi ‘faillissement’ di GVI ta e manera korekto pa terminá un fundashon ku a traha pa gobièrnu pa hopi aña. “Minister por informá Parlamento kon ta pará ku AJJC i SSHC pa ku nan ‘opheffing’? E fundashonnan akí tambe tin debe? Kiko gobièrnu ta bai hasi ku esakinan? Den kaso ku nan tambe tin debe, gobièrnu lo ferwagt ku nan tambe lo pidi ‘faillissement’?” Konforme regla Minister Hato tin 2 luna di tempu pa kontestá e preguntanan akí.