Parlamentario David Seferina a menshoná ku no ta hustu ku estranheronan ku ta bin traha Kòrsou un par di aña, ta risibí mesun suma di AOV kompará ku otro habitantenan ku a traha for di nan 18 aña.

Willemstad, — Parlamentario David Seferina a hasi pregunta den sala di parlamento pa lo ke ta trata AOV ku estranheronan ta risibí.

Parlamentario David Seferina di frakshon a kompartí ku fondonan di AOV ta fluktuá durante añanan i ku e aña di 2022 e fondo aki a konosé un surplus. Den esaki e parlamentario a menshoná un di e problemanan mas grandi di e fondo aki ta, ku tin hopi estranheronan ku ta bini Kòrsou dos pa tres aña, i ta risibí e mesun derechi riba e suma di AOV kompará ku persona ku a traha for di su añanan di edat yòn. David Seferina a bisa ku esaki no ta hustu ya komo momentu ku e fondo aki tin un défisit, gobièrnu ta tuma medidanan ku ta sali for di benefisio di e persona ku a traha for di su 18 aña.

Penshun di behes tin un karakter di kresementu kual kemen ku e altura di penshun di behes ta dependé di e kantidat di aña ku un persona tabata sigurá i a akumulá riba penshun. Segun SVB, nashonalidat no ta importante pa keda sigurá pa AOV, pero si e persona mester a traha i biba na Kòrsou i paga impuesto di entrada. E suma aktualmente di AOV ta 862 florin pa personanan ku tabata sigurá durante 50 aña.

Siudadano no por solamente biba na Kòrsou, pero su bida sosial, ekonómiko, i hurídiko mester ta na Kòrsou pa asina keda sigurá pa AOV. Esaki ta nifiká ku personanan ku no ta siudadano, pero ku si a traha na Kòrsou i a ser someté na impuesto di entrada manera tur habitante, tambe tin derechi di risibí AOV.  E estranhero ku no por ser konsiderá ta biba permanente na Kòrsou i ta ehersé trabou kontra di pago a kargo di un otro entidat si no ta sigurá pa AOV.