Segun presidente di parlamento Charetti America-Francisca, e nota di kambio no ta kla ainda i minister di Finansa ta den eksterior debí na motibu médiko.

Willemstad, — Diferente parlamentario no ta satisfecho ku minister di Finansa ya komo nan a duna di konosé ku ta wardando riba reunion ku e minister i tambe un nota di kambio di presupuesto 2024.

Parlamentario Giselle Mc William di frakshon MAN, a duna di konos’é ku a nota ku Minister di Finansa ta afó, pero ku parse ku parlamento no a haña kontesta di reunionnan di un manera antisipá. Tambe tin reunionnan di CPR ku te ainda e parlamentario a duna di konosé ku no a haña kontesta ariba. Giselle Mc William kier a sa ki dia e minister ta tuma e reunionnan i e parlamento na serio.

Otro parlamentarionan den e reunion tambe a trese e punto dilanti den kual nan ta wardando riba e nota di finansa di minister di Finansa, Javier Silvania. Parlamentario Michelangelo Martines, di frakshon di KEM kier a enfatisá punto di bista di kolega Ana- Maria Pauletta di partido PAR, i a bisa ku e nota di kambio ta hopi importante pa lokual ta trata den parlamento. Riba 1 di sèptèmber di aña 2023, CFT a pidi minister presidente pa trese nota di kambio.

Charetti America-Francisca, presidente di parlamento, a indiká ku minister di Finansa ta afó pa motibu médiko. Parlamentario Ana- Maria Pauletta di frakshon PAR, a menshoná ku promé ku trata e presupuesto di finansa e lo ke haña un nota di kambio pa asina trata e sifranan di presupuesto mas den detaye. Parlamentario Gilbert Doran di frakshon MFK a menshoná ku ke rekordá ku minister presidènt a menshoná ku e nota di kambio lo a bini despues ku e presupuesto a keda entregá.

Den esaki parlamentario Ana- Maria Pauletta di partido PAR, a menshoná ku minister presidènt por bisa loke e ke pero si ke pa miembronan hasi nan trabou nadrechi, minister presidènt mester entregá informashon i nota di kambio. Amerigo Thode di frakshon MFK, a menshoná ku parlamento a ninga pa e presupuesto keda entrega mas lat, pues awor no mester kontradesí palabra i warda riba e nota di kambio.

Charetti America-Francisca, presidente di parlamento, a menshoná ku nota di kambio tin ku warda riba dje i lo trata e sifranan di e presupuesto den e reunion. E nota di kambio no ta kla ainda.