Parlamento: un biaha mas na soño miéntras tin bastante desaroyo tumando lugá na Bullenbaai i riba tereno di Isla.

Punda—Parlamento di Kòrsou despues di a posponé un reunion importante riba Refineria Isla i búskeda di un sosio stratégiko no a sigui aktivo mas. Un reunion a plania pa tene lugá despues di vakashon no a duna muchu resultado, miéntras tin aktividat tumando lugá riba tereno di Isla, sin parlamento di pueblo di Kòrsou ta na altura.

Dos kompania internashonal, Oryx Petroleum i Global Oil Management Group a keda konfirmá di ta firmá temporalmente ku Isla, sin ku Parlamento tin informashon. Por ehèmpel, e kontrakt ku Global ta firma i ehekutá, unda ya Global ta pagando despues di a blòkia diferente fasilidat tekniko riba tereno di Isla.  Manera ta konosi, presidente di Parlamento Charetti America-Francisca a konvoká e debatenan ku gobièrnu tokante dos tema ku tin di aber ku refineria. Ta trata di e petishonnan di Parlamentarionan Giselle Mc William di MAN, Rennox Calmes di TPK, Quincy Girigorie di PAR i Michelangelo Martines di KEM pa debatí tokante e karta pa eskoho di ‘preferred bidder’ pa operashon di refineria.  I tambe e petishon di frakshon di PAR pa un reunion públiko ku karakter di urgensia tokante e kontenido inkriminatorio di e rapòrtnan forénsiko relashoná ku negosiashonnan di Refineria di Kòrsou NV (RDK) i Curaçao Petroleum Curaçao (CPR). 

Pero e tópikonan ei ta den pasado pasobra tin desaroyonan mas interesante tumando lugá. E.o., benta di e fuel oil na 28 mion florin i no ta konosí si ainda RdK a risibi e pago di hür atrasá, miéntras no tin niun informashon riba e adelantonan di Global i intenshonnan di Oryx Petroleum. Parlamento a keda atras riba e último desaroyonan. Por ehèmpel, den nan petishon por eskrito e Parlamentarionan ta mustra bèk riba e echo ku durante e reunion públiko di 16 di yanüari 2023 tokante e tema ‘desaroyonan di negosiashon pa apertura di refineria’, Minister Presidènt Pisas a trese dilanti ku e lo laga RDK pone algun dokumento relashoná tokante e reunion “ter inzage” di Parlamento.

Tur esakinan ta tópikonan antigua. Na e momentonan aki, Bullenbaai ta sin un hürdó, okashonando pèrdida di benta Makro Ekonómiko, Global Oil Management tin un kontrakt deskonosí pa Kòrsou miéntras Oryx ta papiando kompra i distribushon di gas. Aparte di esei, benta di fuel oil riba destaho públiko a tuma lugá sin informashon suministrá na parlamento.