Zita Jesus Leito ke sa mas tokante di e retonan ku SVB ta dil kuné.

Willemstad, — Parlamentario Zita Jesus-Leito  a duna di konosé den reunion di komishon sentral dia 24 di novèmber, ku for di aña 2012 no a atendé kuenta anual di SVB den parlamento.

Parlamentario Zita Jesus-Leito di frakshon PAR a menshoná ku aña pasá despues ku e kuenta anual di SVB a sali riba 18 di yüli a pidi un reunion pa asina atendé ku esaki. Zita Jesus-Leito a menshoná ku un aña i par di luna despues, ta un di e poko biaha nan  ku a invitá SVB pa asina atendé e kuenta anual aki. Den e kuenta anual di SVB ta mira e estado di nos salubridat i pago di penshun. Zita Jesus-Leito a indiká ku ke mas klaridat pa loke ta trata e fondonan di SVB.

Parlamentario Zita a kompartí den parlamento ku e ke sa mas tokante di e retonan ku SVB ta dil kuné i tambe ke mas klaridat tokante kon e Schommelfonds ta funshoná. Tambe  Zita Jesus-Leito a duna di konosé ku entrada di AVBZ por ehèmpel, ta ménos ku e gastunan i ke haña un splikashon di esaki di parti di minister di GMN. Tambe e parlamentario a puntra kiko direktiva di SVB ta konsiderá awor aki e desishonnan mas importante ku gobièrnu mester tuma pa manehá e fondonan di e instituto mas mihó.

Den nan karta di 17 di òktober, basá riba e resultado den e relato i kuenta anual riba gastunan di salubridat i tambe gastunan di penshon, ta nesesario pa nan komprendé e maneho hibá den aña 2021 pa loke ta SVB den general. Den karta di 6 novèmber tambe a manda karta pa asina atendé kuenta anual di 2022 tambe. Tambe e parlamentarionan ke deliberá riba kua ta e plan nan pa futuro pa por garantisá kontinuidat di fondo den salubridat i tambe e fondo di penshon.

Segun e karta ku frakshon PAR a manda dia 17 di òktober, “SVB ta ehekutá e diferente lei sosial. Entre otro e fondonan ankrá den e ordenansanan di seguro básiko (BVS), AVBZ i AOV. Durante e último añanan tabatin diferente desaroyo den e fondonan akí. Nan ta forma parti di e ‘schommelfonds’ i nos ta mira ku e plaka den e ‘schommelfonds’ ta bahando drástiko. Nos ta mira ku e ‘schommelfonds’ ta birando dia pa dia mas bashí. Esaki ta komo konsekuensia ku gobièrnu su kontribushon na e fondo akí kada biaha ta bira mas altu pa mantené e balansa.”