Bos di pueblo tambe ta konta den e investigashon ku parlamento ta hasi riba e proseso pa yega na un hòspital nobo.

Willemstad, — Komishon Enkuesta HNO a tene dos seshon ku públiko djasabra 2 di desèmber último na Barber i Montaña. Den esaki komishon HNO a splika tokante di e investigashon, e desaroyonan di esaki i e motibu ku ta involukrá pueblo.

Parlamentario Eduard Braam di frakshon MFK i presidente di Komishon Enkuesta HNO a indiká ku komishon HNO ta pasando den un proseso investigativo den kual ta sinta huntu ku investigadónan, ekspertonan, klankborggroepen, i tambe siudadanonan pa asina tene diálogo, tuma informashon, i tambe kompartí  informashon. Eduard Braam a indiká ku parlamento ta tuma akshon segun lei i ku e investigashon basta kompliká den kual ta involukrá mas tantu hende posibel pa asina bini ku transparensia pa lokual ta trata e sènnan ku a bai na konstrukshon di CMC.

Eduard Braam a indiká ku durante e enkuentro dia 2 di desèmber último, a kubri diferente tópikonan por ehèmpel, meta di e komishon, kiko e investigashon ta kosta, i kon leu ta ku desaroyonan. Konsultashon ku pueblo ta nesesario i ta un proseso unda ta reuni e opinion, aporte i reakshon di hende den komunidat i ta un forma di demokrasia partisipativo unda gobèrnashon òf otro instànshanan ku ta tuma desishon ta inklui aktivamente e opinion di pueblo den desishonnan ku nan ta tuma.

 Eduard Braam a  kompartí ku no ta awor ta buskando informashon, pero ku tin basta informashon kaba, pero ta importante pa profundisá e investigashon. E parlamentario a kompartí ku e komishon HNO anterior a traha un reportahe temporal i ku for di esaki a saka masha informashon bálido ku tambe lo kedá uzá dor di komishon nobo. Awor ku Eduard Braam ta presidente di e komishon el a indiká ku mester pone polítika na banda i trese mas balansa. Pa e motibu aki parlamentario Giselle Mc William di oposishon ta vise presidente di e komishon enkuesta HNO.

Komishon enkuesta HNO ta atendé ku 5 tema prinsipal den investigashon di hospital nobo entre otro e lokashon, finansa, gobernashon, transishon i tambe e proseso tékniko di konstrukshon. Eduard Braam a indiká ku riba kada un tema ta hasi konsultashon ku e grupo prinsipal. E parlamentario a indiká ku den e ‘onderzoeksopzet/ procesbeschrijving’ ku komishon Enkuesta HNO a traha último aña riba dje a indiká tambe na kual momento ta envolví pueblo. Eduard Braam a indiká ku e proseso investigativo no ta para na e diálogo ku a keda tené dia 2 di desèmber último so, pero ku tambe a traha un enkuesta riba papel ku preguntanan ‘multiple choice’ di kual siudadanonan por yena despues.

Pues den e enkuentro di dia 2 desèmber último a pidi pa siudadanonan agregá nan konosementu, espektativanan, i sugerensianan pa loke ta trata e enkuesta aki. Eduard Braam a indiká ku dia 13, 14, i 15 di desèmber lo tene ‘hoorzitting’ preliminario ku siudadanonan i den febrüari lo tene e ‘hoorzitting’ públiko.