Charetti Fransisca

WILLEMSTAD – Presidente di Parlamento Charetti America-Francisca a konvoká un reunion di Komishon Sentral dia 15 di sèptèmber próksimo tokante restrukturashon di transporte públiko, riba petishon di frakshon di PAR. Lo deliberá ku Minister di Tráfiko, Transporte i Planifikashon Urbano (VVRP) Charles Cooper. E reunion ta start 9’or di mainta.

Parlamentarionan Zita Jesus-Leito, Ana Maria Pauletta i Quincy Girigorie i Steven Croes a manda un karta fechá 7 di yüni e siguiente dia pa America-Francisca ku e petishon pa yama e reunion. “Durante e gobernashon anterior a kuminsá traha duru riba restrukturashon di transporte públiko pa asina e por ta efektivo i sirbi pueblo di Kòrsou pa hasi uso di transporte públiko mas mihó. Tambe e lo sirbi otro gruponan den komunidat ku pa un òf otro motibu lo ke bai hasi uso di transporte públiko. Den e proyekto akí a traha riba un sistema di konekshon nobo i tambe ampliashon dje bòrchinan di bùs pa asina ei komunidat por hasi uso di esaki for di mas kaminda ku no ta solamente Punda i Otrobanda. Entre otro a pensa pa hasi Barber, Julianadorp, Schottegatweg na altura di Postkantoor; puntonan kaminda lo por hasi ‘overstap’, esta kambia bùs pa asina yega mas rápido na nan destinashon.” Frakshon di PAR ke sa di Minister Cooper kon leu ta ku e plannan pa kambia e sistema di transporte públiko i tambe eventual kambionan ku a bini den e plannan eksistente.