Back to Top
Responsive image
E korant di pueblo

Partido MAN a kuminsá un proseso interno di evaluashon


May 7, 2021 • 1 minüt pa lesa

Willemstad— Resultado di último elekshon pa Parlamento di Kòrsou ta konosí, den kua partido MAN no a logra mantené su posishon elektoral di e elekshon na 2017. Manera ta kustumber despues di kada elekshon, partidonan polítiko ta evaluá e resultado pa por posishoná nan mes polítikamente, pa karga responsabilidat durante e periodo parlamentario di 4 aña i prepará strategianan pa siguiente elekshon.

Den e kuadro aki, direktiva di MAN a forma un Komishon di Evaluashon interno,ku enkargo pa hasi evaluá internamente, aspektonan ku por a hunga un ròl den e resultado ku Partido MAN a optené den elekshon di 19 di mart último. komishon di Evaluashon lo hasi nan evaluashon a base di e método di enkuestanan tantu entrevistanan personal komo por eskrito pa medio di un lista di pregunta pa por kompilá dato riba diferente área. E meta ta pa haña un bista riba eventual aspektonan interno ku por a influensiá e resultado di elekshon pa ku Partido MAN. Debí na e sirkunstansianan di Covid-19 e enkuestanan lo tuma lugá den forma digital.

Miembronan di MAN tin oportunidat pa yena e kuestionario digital durante un periodo determiná. Pa esnan ku no tin fasilidatnan pa yena e enkuesta di forma digital, lo tin posibilidat pa yena e formulario na sede di MAN. E entrevistanan personal tambe mas tantu posibel di forma virtual. E proseso di evaluashon ta kuminsá e siman aki i lo keda implementá den un término di kuater siman, dependiendo di desaroyo di e situashon relashoná ku Covid-19.Resultado di e evaluashon lo keda analisá pa direktiva i órganonan interno di partido, miéntras ku konklushonnan di tal análisis lo sirbi pa determiná strategianan interno, pa funshonamentu di partido MAN su organisashon i proyekshon pa futuro.

Login