Aki na Kòrsou tambe a akusado tabata será.  

AMSTERDAM/WILLEMSTAD – E hòmber Jamel Lomp ku ta sufri di problemanan mental i ku ya a risibí diferente kondena na diferente pais, inkluyendo su pais natal Kòrsou, a presentá ayera pa tratamentu di su kaso den Korte na Hulanda. El a bisa Korte ku dia 20 di yüni último e víktima di 36 aña a muri pa motibu di vengansa ku e tabata ke kometé kontra e kadena di supermarket Albert Heijn. El a hinka e dama Antoneta ku un kuchú ku el a bai buska den e negoshi mes.

Lomp di 56 aña ta un persona ku a kousa hopi molèster tur kaminda na mundu ku el a biba. Ayera el a bisa Korte na Hulanda ku e víktima tabata na e sitio i momentu robes. El a drenta Albert Heijn na Turfmarkt na Den Haag pa kumpra un bleki di limonada. Te na momentu ku e tabata den e supermarket numa a drenta un idea den su mente ku e mester ‘regla’ algu ku Albert Heijn. El a puntra un trahadó unda e kuchúnan ta. El a habri e paki i saka e kuchú, kana bai na e panaderia inkonsientemente. Segun Lomp e dama tabata pará einan na e sitio i momentu robes. E ke a tuma vengansa.

Segun medionan hulandes kasi sigur Lomp ta referí na un insidente anterior na Albert Heijn den Zwijndrecht. Dos luna promé ku e insidente fatal, polis a arestá Lomp einan, sospechand’e di a hòrta un paki di lechi. Lomp a sintié deskriminá pa tantu e polisnan komo e bewakernan. Hues a deklar’é liber di kulpa p’e ladronisia dje paki di lechi. Pero Korte a konden’é tòg pasó Lomp a menasá funshonarionan públiko. El a sali liber un siman promé ku e insidente kaminda el a hinka e víktima den Albert Heijn mata.

Ministerio Públiko tampoko ta mira indikashonnan ku Lomp a skohe e víktima konsientemente, pero pa sigur ta investigando ainda. Outoridatnan ta analisando e imágennan di kamara di e simannan promé dje supermarket. Mientrastantu Lomp ta será. Na final di òktober lo intern’é den e instituto sikiátriko Pieter Baan Centrum, kaminda spesialistanan lo hasi investigashon i analisá su estado síkiko.

Lomp ta basta konosí na Kòrsou. Tantu aki komo na Hulanda mes i tambe Gran Bretania, el a risibí kondena di Korte pa menasa i violensia. Na Kòrsou e tabata asta será den Klínika Capriles, pero e tabata asina agresivo pa personal, ku e instansia akí tampoko tabata ke mantené Lomp interná. Echo ta ku na Kòrsou no tin un klínika spesial pa trata hende ku desorden mental manera Lomp. Hulanda tampoko tabata ke tuma Lomp i intern’é, kemen no a dura mashá ku e tabata den libertat atrobe. I asina el a haña e espasio atrobe na Hulanda, pa bolbe ataká pero e biaha akí ku resultado fatal.

Segun medionan di komunikashon di Hulanda, ta for di aña pasá ku el a regresá e pais ei, e tabata okashoná problema. Na e último kaso, kaminda el a risibí kondena pa insidentenan na Zwijndrecht, el a risibí un kastigu igual na loke el a sinta durante su aresto preventivo kaba. Kemen e por a bai kas mesora. Ministerio Públiko no tabata kontentu, ya ku nan tabata ke interná i pone Lomp bou di opservashon den Pieter Baan Centrum mesora.

Na momentu ku e notisia a plama ku Lomp a mata hende na Hulanda, tur pais kaminda e tabata konosí tabata di shòk. Na Kòrsou tambe e pregunta klave a lansa, ki mishi e hòmber liber mes, te pa el a mata hende na Hulanda. Despues a resultá ku e huesnan na Hulanda supuestamente no tabata na altura di Lomp su pasado, ni ku a imponé tratamentu obligatorio p’e na Kòrsou. Loke ta masha straño si tene kuenta ku durante tur tratamentu di tur kaso penal, huesnan ta studia e karchi di kastigu dje sospechoso.

Famianan di su último víktima ku sí a pèrde su bida ta kibrá. E kasá di Antoneta no por a ni presensiá tratamentu di e kaso. E dia promé ta ambulans mester a yama p’e. A mand’é kas ku píldoranan di kalmante. Asina e abogado dje famia a splika Korte. Pero no ta e pèrdida so ta e loke ta kibra su kurason, pero tambe frustrashon. E no ta komprendé kon un hòmber asina por tabata kana liber sin niun problema. Segun e abogado di famia, instansianan a faya. Pero nan ta warda resultado final dje investigashon, pa disidí si nan lo tuma pasonan hurídiko.