Patrick Newton.
PARERA—Segun direktor di Refineria di Kòrsou, Patrick Newton e akuerdo entre Refineria di Kòrsou i PDVSA riba un interkambio di debe pa produkto ta “fair”, esta rasonabel. E direktor ta spera ku e konsekuensha di aserkamentu entre e dos partidonan alabes por krea mas kupo di trabou na Kòrsou.
Newton a splika ku e ta deseá pa Refineria di Kòrsou bai bek na unda e tabata kontribuí na por lo ménos 10% di e Produkto Nashonal Brutu di Kòrsou. Manera menshoná e akuerdo ta obligá PDVSA di manda 45 mion dòler anual na produkto durante 10 aña. Finalmente, pa promé biaha e direktor a atmití ku e biaha aki si e lisensia di OFAC no ta un problema. Segun Newton, Refineria di Kòrsou tin un lisensia OFAC mas amplio kual ta permití importashon di produktonan petrolero for di Venezuela.