WILLEMSTAD—–Karnaval, e temporada di hopi goso i ambiente a yega atrobe. Grandi i chiki kièr asistí na tur aktividat karnavalesko. Pero no tur aktividat ta pa tur edat. Komo mayor bo ta keda responsabel pa bo yu i ta bo deber di tuma desishonnan korekto pa protegá bo yu na tur momentu.

Ta importante pa nos ta konsiente di e peligernan ku por tin durante e temporada di Karnaval

No ta apropiá pa bai ku beibi òf mucha chikitu aktividatnan pa adulto anochi òf para hinter dia wak marcha di Karnaval. Tene na kuenta ku mucha tin ku drumi na tempu. Nan tin derechi riba sosiegu, bon nutrishon i protekshon. No solamente protekshon pa nan oido kontra muzik duru òf pa nan kueru kontra rayonan di solo, sino protekshon kontra maltrato, deskuido i negligensia.

Awor ta serka ken bo ta laga bo yu?

Den e temporada di Karnaval tin yen krèsh klandestino ta ofresé nan servisio sin ta kapasitá pa por kuida ni un yu. Laga bo yu serka e ‘babysitter’ mas barata òf esun riba ruta di kas òf lag’é bai ‘sleepover’ serka amiga ku nunka b’a yega di drenta su kas, no ta e mihó eskoho. Perkurá pa bo yu ta na un lugá seif i bou di guia di un persona ku bo konosé i sa kon responsabel e persona ta.

Keda alerta!

No laga un mucha bai baño òf kumpra kos su só riba kaya, ni maske kon serka e tin ku kana bai. Perkurá pa e mucha no pèrdè. Sòru pa un adulto responsabel tin bista riba e mucha na tur momentu i pa e mucha sa su nòmber kompletu, adrès i un number di telefòn òf tin un karchi ku e informashon aki pegá na su paña. Mustr’é persona uniformá manera polis (KPC), VKC òf BSF ku e por pidi yudansa.

Durante e temporada di Karnaval uso eksesivo di droga i alkohòl por tuma lugá, ku por hiba na diferente tipo di abusu. Esaki ta un motibu dikon kasonan di violensia doméstiko tambe ta oumenta den e temporada aki den nos komunidat. Evitá na eksponé mucha i hóbennan na e situashonnan aki ku no ta kuadra ku nan fase di desaroyo.

Sea konsiente ku abusu en general i prinsipalmente abusu seksual ta tuma lugá mayoria bia dor di un persona konosí. No ta solamente hende hòmber, pero hende muhe, por ehèmpel un tanchi òf un prima, tambe por kometé abusu seksual kontra menor di edat.

Laga un hóben/menor di edat ‘babysit’ un mucha mas chikí kuné, por ehèmpel laga un ruman grandi/primu(a) di 15 aña keda kas su só ku un ruman/mucha chikí di 4 aña tampoko no ta responsabel. Un tersera parti (1/3) di abusu seksual kontra mucha ta wòrdu kometé dor di un persona bou di 18 aña di edat esta un otro menor di edat.

Mucha no por bira víktima pa falta di responsabilidat di adulto!

‘Fundashon Bos di Hubentut’ ta haña sumamente importante pa tur mayor i edukador papia ku nos mucha i hóbennan riba e peligernan manera abusu en general i abusu seksual ku por tuma lugá durante e temporada dushi di Karnaval pa nan por rekonosé peliger na tempu i sa di pidi yudansa pa nan mes òf un otro persona.

Pa mas informashon tuma kontakto durante oranan di ofisina na telefòn 462-2442, 461-8103 òf riba WhatsApp 524-5362.