WILLEMSTAD,—-E bon presentashon di agrupashon musikal “Tico and Friends” djasabra tras di lomba durante di ZomerKarnaval, a pone ku awor tin petishon pa e legendario kantante ‘Tico’ Libiee lanta un agrupashon musikal nobo na Kòrsou. Esaki ku e front formá pa e tres kantantenan ku a presentá na Hulanda.

Ta trata aki di Quincy Cicilia, Danny Yanga, ‘Cocu’ Bregita. E kuater kantantenan a pèrkurá pa sende marcha di ZomerKarnaval. Esaki a pone ku awor hopi hende ta mira ku e front ku ‘Tico’ Libiee a forma pa partisipá kuné djasabra tras di lomba, por bira un front ku por hasi hopi kos den farándula di Kòrsou.

Sinembargo e desishon ta den man di e kantantenan menshoná i pa djei nan kuminsá traha riba músikonan pa na final nan forma agrupashon musikal “Tico and Friends”, pa kuminsá move den farándula lokal.

Vigilante Farándula a trata pa yama ‘Tico’ Libiee na algun okashon, pero sin resultado deseá. E loke ku a pasa na Hulanda djasabra tras di lomba, a trese un buèlta hopi interesante den farándula lokal, i esaki asta por bai trese un agrupashon musikal nobo den farándula lokal.