Segun Pisas, e forma den kua ta kumpra kombustibel tambe ta un faktor ku lo bai analisá

WILLEMSTAD——“Via di e plan B3 akí, gobièrnu ta ekstendé finansiamentu (invershon) inisial pa mantené e planta di CRU (BOO-plant) operashonal, pa asina por kubri e gastunan di operashon di e parti di e infrastruktura den refineria ku ta usa pa garantisá suministro di kombustibel.

E plan B3 ta enserá tambe mantenshon di e kantidat di trahadónan nesesario pa asina CRU por funshoná optimalmente. E finansiamentu akí su karakter tabata temporal (te ku yanüari último), te na momentu ku refineria bolbe start bou di un operadó nobo.” Teniendo kuenta ku no a logra atkerí un operadó nobo ainda, gobièrnu a urgi tantu Refineria di Kòrsou (RdK) komo Curoil pa refinansiá e plan B3, pa asina por sigui mitigá subida riba gastu di produktornan di kombustibel. “Mester remarká ku esaki tambe tin un karakter temporal i ta finalisá konforme palabrashon fin di yüni 2023. E komishon introdusí i ku ta kai bou di responsabilidat di Promé Minister, ta hasiendo e ehersisionan nesesario pa por yega na un solushon struktural.”

Otro aspekto ku tambe gobièrnu ta konsiderá i analisá, ta e reglanan (‘richtlijnen’) pa importashon di diesel. Posibel kambionan den esakinan ta trese kuné ku awó por impotrá ‘ultra low sulfer diesel’ (ULSD) tambe, ku den prinsipio lo Sali mas barata ku esun aktual, esta LSD. “Ta dependé di e preis di kompra di momentu.” Ademas, Minister di Desaroyo Ekonómiko a laga hasi un estudio riba e kalidat di gasolin i diesel, for di kua a sali rekomendashon konkreto pa yega na un kalidat di kombustibel (dor di modifiká e spesifikashonnan) ku ta den liña di eksigensianan aktual. “Tambe tin proposishonnan konkreto pa introdusí un sentro di monitoriá i kòntròl di kalidat, i rekomendashonnan pa mehorá e kadena di distribushon.”

Segun Pisas, e forma den kua ta kumpra kombustibel tambe ta un faktor ku lo bai analisá. Despues lo kuminsá ku implementashon di e rekomendashonnan. Ku esaki Pisas ta fèrwagt ku entre otro e gastunan di kumpra kombustibel lo por baha i ku modifikashon di e spesifikashonnan di kombustibel lo ta protegé, i alsa efisiensia di motor di vehíkulonan ku ta kore riba kareteranan lokal, ku na su turno ta redusí gastu di mantenshon.