WILLEMSTAD,—E proyekto di Curaçao Festival Center, ku a start na 1990, komo un proyekto di AMAK, algun spònser, gobièrnu i ku sosten di diputado di kultura, Dito Mendes de Gouveia, a keda neglishá e último 20 añanan.

Dikon e maneho di gobièrnu ta krea espasio, pa sostené fasilidatnan di deporte, ku tin entradanan finansiero lukrativo, miéntras no tin ningun forma pa stimulá fasilidatnan di arte. Al kontrario, nos ta na altura, ku ta kobrando fasilidatnan kultural musikal, sumanan astronómiko, entre otro via “erfacht”.

E maneho aktual ta oumentá , tur obligashonnan fiskal, por kondusí hasta na siere di e kompleho aki tambe, ku durante último 30 añanan a duna formashon musikal grátis na sentenáres di hóbennan. E burokrasia pa haña pèrmit pa organisá aktividatnan kultural, manera tambú  i fiestanan na sitionan den bario i na playanan, ta un kaminda di krus.

Aparte di e gastunan pa haña e pèrmit, ta tuma siman largu, promé ku e promotor keda akordá pa por organisá su evento. E eksigensia di instansianan di gobièrnu riba fasilidatnan kultural ta enorme i kostoso, miéntras fasilidatnan di deporte kaminda míles di persona ta asistí, si no mester di kumpli, ku e eksigensianan di seguridat tan severo. No tin ningun forma di fleksibilidat pa lokual ta trata  nos fiestanan i konsiertonan. Gana o pèrdè , e promotor mester paga su obligashonnan fiskal.

Aktividat nan kultural tin ku paga sumanan haltu , miéntras pa deporte si tin tarifanan spesial. Mester por krea sierto sistemanan atministrativo, manera ta e kaso na Hulanda. Riba tera frieu gastunan di entre otro un plan di seguridat ‘Veilgheidsplan’ ta optenibel, pa kua bo ta paga un suma di apénas € 100, i no sumanan di riba 10 mil florin. Kontròl di fasilidatnan ta tuma lugá 2 biaha pa aña i no pa kada evento. A eliminá “Kas di Kultura” ku tabata hustamente e proyekto ku na 2003, mester a salbaguardiá nos proyektonan kultural i promové arte en general den tur bario di Kòrsou.

Tur e songfestivalnan di ántes, den diferente sentro di bario, ya no tei mas, ya ku no tin medionan finansiero pa hasi esei. Ta bon pa refreská nos memoria, ku tin vários ehèmpel.  Nos artistanan a saka kara di Kòrsou internashonalmente, durante festival nan di OTI i CBU. Logronan importante di George Willems na Chile i Cedride na Puerto Rico, tur den felis memoria. Melania  na Spaña i Kissy Getrouw na Barbados tabata eksitoso.

Tin artistanan ku a profilá den gran forma na Merka, Spaña i Oropa. Te ainda Kòrsou tin Juni Juliet, Ephrem J, ta sakando kara di Kòrsou. Un Toni Sherman ku pa aña largu, huntu ku otro artistanan a logra hopi éksito internashonalmente..

Gobièrnu, Ministerio di Kultura Enseñansa i Deporte,mester por traha riba un plan di maneho kulturalòf hasi uso di plannan eksistente di Dr. Rene Rosalia i di defuntu Pacheco Domacasse pa stimulá aktividatnan di arte, ku na mes momento, por yuda krea mihó siudadano.