WILLEMSTAD, — Minister Larmonie-Cecilia a bisa ku PNP no por a bai akuerdo ku moshon pasombra informashon di esaki no tabata kuadra.

E moshon tabatin diferente parti ku no ta kuadra i p’esei PNP no por a bai di akuerdo ku esaki, minister di asuntunan sosial ta splika. E punto kaminda ta bisa ku lo premirá ku den añanan binidero no tin indeksashon di AOV, no ta kuadra minister Larmonie ta splika. Tambe minister a bisa ku den presupuesto a reserva fondo di supuesto 1.8 mion pa AOV, pero esaki tampoko no ta kuadra. Minister ta bisa ku “a indiká den reunionnan anterior ku a laga SVB hasi konteyo pa nos den kual por a mira kiko lo nifiká si nos bai pa indeksá e AOV awor aki”. “Ora a mira kiko a haña na sifranan djis pa indeksá e AOV, e aña aki lo konta ku un subida di AOV”.

“Pues nunka lo por a bai di akuerdo ku algu no por a ehekutá. E moshon ta un deseo pero ta kere si ku nos deseonan mester kuadra ku realidat i no solamente bai di akuerdo ku moshonnan kaminda gobièrnu no por ehekutá”. Ta pa e motibu aki minister di asuntunan sosial ta splika ku no por a bai di akuerdo ku e moshonnan. Aktualmente ta hasiendo ehersisionan pa evaluá kon pa re-introdusi e indeksashon di e montante di AOV pa asina nos grandinan por mantené nan forsa di kompra. Periodo di Covid tabatin efekto negativo riba ekonomia i esaki a resultá den efekto negativo ya komo primanan a kai konsideradamente pero si mester a sigui paga esakinan normal.

Pa lokual ta trata liña di pobresa minister ta bisa ku esaki ta konosí via CBS i ta 1800 florin pa luna. “Tin alrededor di 9.500 personanan ku ta kobra AOV den nos komunidat. Personanan ku ta kobra AOV so i ta kai bou di nivel di pobresa mester wòrdu evaluá ainda”. Minister ta bisa ku si mira lokual  CBS ta nota komo ‘bestaansminimum’  ta mira ku tur hende ku ta kobra salario mínimo tur ta kai bou di ‘bestaansminimum’. Si esaki nos ke uza  komo liña pobresa, nos tin nos kontesta kaba. Minister ta agregá ku tin trahadónan den gobièrnu ku tambe ta kobra bou di e ‘bestaansminimum’ den nos komunidat i no trahadónan fuera di gobièrnu so.

Parlamentario Ana-Maria ta bisa ku ke di minister di SOAW pa duna definishon kiko ta kai bou di liña di pobresa i si esaki ta sea ‘bestaansminimum’ òf salario mínimo. Ana-Maria Pauletta ta bisa komo parlamento a traha moshon pa asina komprondé e situashon di trahadónan ku ta kai bou di liña di pobresa pero koalishon no  a bai di akuerdo ku esaki. Kon por ta ku a kontinuá ku e maneho ku awor aki tin trahadó ku ta bou di liña di pobresa? Pauletta ta puntra. Pauletta ta bisa ku mester regla e asuntu di trahadónan ku ta kai bou di liña di pobresa tantu den gobièrnu komo den enseñansa mas pronto ku ta posibel.