Por medio di un enkuesta, parlamentario Gwendell Mercelina ke tin un relashon interaktivo ku públiko pa asina e por ta un mió polítiko.

Willemstad, — Parlamentario Gwendell Mercelina ke oumentá partisipashon sosial den gobernashon di pais Kòrsou por medio di un enkuesta ‘BanHèndel’ di opinion públiko.

Parlamentario Gwendell Mercelina di partido PNP a krea un enkuesta polítiko digital ‘BanHèndel’ pa asina haña un bista riba maneho di pais i tambe pa asina evaluá su partisipashon polítiko. Di e forma aki Gwendell ke tambe pa oumentá partisipashon sosial. E preguntanan di e enkuesta ta enserá entre otro si siudadanonan ta kontentu ku e resultado di gobernashon di Kòrsou for di 2021 te ku awor.

Tambe Gwendell Mercelina ke sa opinion públiko tokante di trabounan ku partidonan di koalishon ta hasi i kua partido ta hasiendo un trabou na interes di pueblo. Gwendell ta hasi pregunta tokante di prestashon di Parlamento i prestashon di Gabinete Pisas ll i tambe parlamentarionan. Tambe a puntra opinion públiko tokante di funshonamentu di mandatarionan.

Pa lokual ta trata karakterístikanan importante enkuestadonan por kompartí kua te kalidatnan ku nan ta haña importante. Esakinan ta enserá integridat, outéntiko, vishonario, inteligensia, komunikashon, responsabilidat, inovativo, transparensia, liderazgo, i patriotismo. Den e enkuesta ta puntra kiko siudadanonan ta haña importante den siguiente elekshon por ehèmpel, refineria isla, kambio di klima, asuntunan general manera problema ku Venezuela òf e guera di Rusia i Ukraina.

Por último den e enkuesta Gwendell Mercelina ta pidi opinion públiko tokante di prestashon di su mes den e arena polítiko i si e tin òf tabatin bon kobertura i atenshon pa asuntunan nashonal. Ku e enkuesta aki e parlamentario ke yega  na un proseso interaktivo, partisipativo, i inklusivo. E enkuesta aki segun Gwendell, ta sirbi pa e por ta un mihó polítiko, un mihó lider, un mihó suidadano ku ta ekipá, pashoná, ku ta sirbi i traha ku kurason pa su komunidat.