Gwendell Mercelina ta kompartí ku ta importante pa pensa kon nos enseñansa ta hinká den otro pa lokual ta trata konosementu di emansipashon.

Willemstad, — E yabi prinsipal pa emansipashon ta edukashon segun parlamentario Gwendell Mercelina. E aspekto di sklabitut tambe a ser menshoná den e programa di mehorashon di enseñansa Kòrsou 2023-2028.

Parlamentario Ana Maria Pauletta a duna di konosé anteriormente ku e balansa di emansipashon ta un balansa hopi grandi. Por papia di sklabishon pa libertat, pero tambe por papia di emansipashon di género òf di finansa. Parlamentario Gwendell Mercelina a kompartí anteriormente ku edukashon tin un ròl sumamente importante pa lokual ta trata emansipashon. Gwendell Mercelina a kompartí ku ta importante pa pensa kon nos enseñansa ta hinka den otro.

Esaki ta enserá tambe edukashon di Reino, segun Gwendell Mercelina ta splika. Ya komo sa hopi mas di e parti di den Reino i ménos di e parti i e ròl den Oropa. E parlamentario a puntra kiko nos edukashon ta hasiendo pa hóbennan por komprondé e esensia emansipatorio di pais Kòrsou. E parlamentario a menshoná entre otro ku tin Fundashon NAAM,  diferente komishonnan, i tambe direktorado ku ta pone eksposishonnan pero Gwendell Mecerlina ke pa definí kiko ta konsiderá emansipashon reflehando riba e proseso ku nos a kana.

E aspekto di sklabitut tambe a ser menshoná den e programa di mehorashon di enseñansa Kòrsou 2023-2028. Segun e programa, mester agregá mas informashon tokante e historia di sklabitut den nos buki nan di skol. E programa a dediká 120 palabra splikando ku e historia i informashon di sklabitut ku nos muchanan ta haña na skol mester wòrdu renobá i mester wòrdu spliká den e perspektiva di Kòrsou. Gruponan a dialogá den pasado i a rekomendá pa dediká mas tempu riba e historia di sklabitut. Tambe mester agregá enseñansa di sklabitut den nos kuríkulonan di edukashon.

E programa di mehorashon di enseñansa Kòrsou 2023-2028 ta agregá ku bukinan òf otro material di skol tantu pa skol sekundario komo skol di fundeshi ta nesesario pa siña e studiantenan tokante nos historia ku sklabitut.