Demanda di 1 luna kondishonal i 50 ora di trabou pa agente polisial sospechá di a  maltratá menor di edat.

Nieuwe Haven,– Ayera korte a trata kaso di un polis mas ku mester a presentá pa asina  responsabilisá su mes di keho di violensia ku a keda entrega den su kontra na momento ku e tabata kumpliendo ku su labor.

E agente  Polisial C di 53 aña a skucha e akusashonnan den su kontra ayera di un kaso ku a tuma lugá na aña 2021 unda ta akusá e agente polisial di a usa violensia desproporshonal.  E agente polisial aki ta wòrdu akusá di a maltratá un menor di edat. E Polis C. ta wòrdu akusá ku riba dia 22 di òktober 2021 intenshonalmente mester a hasi di su klòp i un porta di outo pa por a maltratá un persona. Ta akusá e agente polisial di a hasi uso di violensia kontra di un menor di edat dor di rank’é, push’é i dale hasiendo uso di un klòp kontra  su pianan. Tambe ta akusá e agente polisial aki di a pusha e menor di edat ku e konsekuensha ku e mester a bai dal sea su kabes òf lomba kontra porta di e vehíkulo polisial.   Tambe ta akusá e agente polisial aki di sea a pusha e porta di e outo di polis i òf a dal e víktima ku esaki na su pia pa kual e la sinti doló i sufri leshon. 

E sospechoso a splika wes ayera ku niun momentu so e no a dal ni sera e hóben su pia den porta di forma intenshonal. El a splika ku riba radio nan a haña òrdu pa duna asistensia pa bringamentu den Sentro di Siudat unda kaminda hóbennan tabata bringa ku otro. Na momentu ku e patruya a yega nan a topa ku mas di 20 hóben strobando órden públiko i nan a baha pa aktua kaminda ku nan a bin topa ku e dos hóben nan ku supuestamente tabata den problema ku otro di kual un di nan su mayornan a yega i polis a duna òrdu na e mayornan pa bai warda di polis i nan lo bini ku e otro hóben kaminda lo yama esaki su mayornan pa konfrontá tur hende ku otro i tèrminá ku e problema.

E sospechoso kende ta un agente polisial ta bisa ku na promo instante e menor di edat a akseptá pa bai, pero na momentu ku tabata bai outo kuné el a kuminsá zundra tira skòp i moketa kual a pone ku e radio di polis a bai kai basta leu i tabata akinan ku el a tik e hóben ku e klòp na su pia.

Pa loke ta e asuntu di porta di outo, e agente polisial a splika ku niun momentu so e no a sera e hóben su pia intenshonalmente den e porta di outo, sino ku ta e hóben tabata trata di wanta e porta di outo.  Riba e parti aki tabatin imágen nan di video ku a keda presentá den korte ayera.

FISKAL

Segun fiskal e echonan ta proba i kastigabel i e úniko pregunta ta ku si e polis mester a aktua, pues ku si e polis tin mag di aktua asina, siendo ku tin reglanan kon polis mester aktua den tipo di kasonan asina, Fiskal ta bisa ku polis por usa arma, pero ta dependé e sirkunstansia i mirando e kaso aki kaminda ku e polis tin hopi aña di servisio, e mester sa ku por a aktua di otro forma. Pues segun e fiskal, mirando ku e echonan ta proba i kastigabel i ku e polis aki a yega di haña kastigu kaba den pasado pa maltrato, e ta pidi 1 luna di kastigu kondishonal ku tempu di prueba di 3 aña i tambe 50 ora di trabou boluntario i pa duna e víktima un daño perwisio di entre 3 pa 5 mil florin despues ku nan a pidi 25 mil, pero Fiskal a bisa ku esei ta muchu haltu pa un kaso asina si kompará ku kasonan similar.

HUES

Hues Mr. Carmelia a bisa ku e ta sera e kaso i ta bai duna sentensia dia promé (1) di desèmber pa 13.30.