Willemstad— Polis mester a bai Rooseveltweg na altura di e kadena di ofisina di number Joe Black pa ponementu di fever ku a bin terminá den un aksidente.

Djasabra den oranan di atardi a pidi presensia di Polis ku urgensia nèt dilanti di e kompleho di benta di number di Joe Black riba Rooseveltweg pa ponementu di fever ku a terminá den aksidente. Henter e ponementu di fever a ser graba i por a mira esaki na momento ku e la bira viral. Por a mira un vehíkulo di e marka Camaro tabata pone fever na e parti pariba di e edifisio di Joe Black pa despues a sigui lastra bai nèt dilanti di e edifisio poniendo  mas fever i por último a bai dal tras di un outo kolo blanku ku tabata nèt stashoná dilanti di e edifisio. Por a mira riba e video kon e shofùr a bula baha mesora for di e vehíkulo pa asina wak kiko tabata pasando. Polis ku a keda avisá a presentá na e sitio a keda avisá ku ta fever e vehíkulo tabata pone ku e la okashoná e aksidente. E loke ku a ser bisa por a wòrdu sostené ya ku na e sitio tabatin kantidat di markanan di tayer. Ora a bai kontrolá e dokumento di e vehíkulo no tabata na òrdu kual a pone ku polis di tráfiko ku a keda avisá pa e suseso mesora a presentá na e sitio i a konfiská e vehíkulo bai warda kuné pa mas investigashon. ya ta konosí ku ta baha pisa riba ponedónan di fever unda asta den pasado tin doño ku a pèrdè nan vehíkulo. Awor e polisnan  di tráfiko lo bai traha na relato i manda esaki pa Fiskal pa asina por bai tuma un desishon kiko lo bai pasa ku e vehíkulo. E kaso ta den investigashon.