Víktima na suela boka abou despues di a keda likidá.

Willemstad, — E tim di homisidio ta trahando tur ku tin pa asina mas lihé pone man riba esun òf esnan ku ta tras di e likidashon di e reper Boechi ku djabièrnè mardugá a keda asesiná dilanti di e trùk di pan riba Rooseveltweg nèt pariba di e negoshi Welcome shop.

Tabata djabièrnè 9 di desèmber 2022 alrededor di 00.06’or di mardugá, Sentral di Polis a risibí notifikashon ku na un trùk di pan riba F.D. Rooseveltweg pa un kaso di tiramentu a tuma lugá i tin un hòmber gravemente heridá. Mesora a dirigí unidat polisial na e sitio. Na yegada di e promé unidat polisial a topa ku un hòmber drumi boka abou ku diferente perforashon di bala na parti ariba di su kurpa i e víktima no ta dunando señal di bida.

Ambulans ku tambe a keda avisá a presentá na e sitio pero enbèrdat ya no por a hasi nada mas pa e víktima ku tabata drumi den un plas di sanger. Dòkter di polis alrededor di 01.00’or a konstatá morto di, Ruchendell Bonifacio Windster nasé na Hulanda dia 28 novèmber 1992. Na e sitio di e krímen polis a haña i konfiská un kantidat di ‘huls’.

Riba òrdu di fiskal di Ministerio Públiko a konfiská e kurpa sin bida pa mas investigashon. Ta trata di e konosido reper Buchi ku den un korto tempu a bin ta pega vários hit den e mundu di rep. Na e sitio  e tim di reshèrshi tékniko logra di konfiská alrededor di 5 huls ku ta duna e indikashon mesora ku a bini pa likidá e víktima i no manera ku ta ser bisa a presentá na e sitio pa bai ku su kadena.

E víktima resien a yega Kòrsou for di Hulanda na unda e mester a presentá na algun aktividat aki na Kòrsou i tambe unu na Boneiru. Promé ku e víktima wòrdu likidá e la duna su último presentashon den un kura ku ta bende vehíkulo enfrente di e krusada Cubaweg i Rooseveltweg. Einan tabatin un aktividat unda por a inskribí pa un evento ku tin ku tuma lugá awe i mayan na unda e víktima tambe mester a presentá. Despues di a duna su presentashon e víktima huntu ku mas amigu mester a kue direkshon di e pòmp di gasolin na Sta Maria na e establesimentu ku ta keda habri mardugá na unda e la kumpra algu pa despues bai para na e trùk di pan riba Rooseveltweg na unda a presentá i likid’é.

Na momento di su likidashon e víktima tabata den kompania di sigur dos di su amigunan ku ta di importansia pa ku e investigashon. For di ayera Kòrsou i tambe Hulanda ta di luto ku pèrdida di reper Buchi ku ta hopi kerí entre di su fanatikonan. Loke ku tambe a hala atenshon ta ku e aña aki mes esta algun atras e mesun reper aki a duna indikashon riba facebook ku e lo bai wanta un ratu ku presentashon i lo por bai kontinuá e aña benidero pero no a duna e motibu.

Esaki sigur a hala atenshon mesora di su fanatikonan ku a bin ta siguié basta di aserka. Boechi ta trata di un artista basta humilde ku sigur tabata presentá no solamente den konsiertonan pero tambe na fiesta di kas. Tin un kantidat di spekulashon kiko por a yega na e kaso di likidashon aki i esaki ta e motibu ku Polis ta hasi un yamada na komunidat pa yuda i duna informashon pa asina mas lihé posibel logra di solushoná e kaso lamentabel aki. Pas na su restunan.