Tin diferente faktor ku a kontribuí na un rebaho di e kantidat di muchanan ku ta nanse na Kòrsou.

WILLEMSTAD, — Rapòrtnan ku statistik publiká dor di CBS ta duna di konosé ku e kantidat di yunan ku ta nanse ta redusiendo i ku den futuro lo por ferwagt ku e kantidat aki lo sigui baha.

Sifranan di CBS ta duna di konosé ku den e tres añanan promé ku 2016, tabatin un disminushon relativamente fuerte den e kantidat di nasementu ku a ser registrá na Kòrsou. Entre 2014 i 2016 tabatin un rebaho di 174 mucha ku a nanse na Kòrsou. E disminushon aki, un porsentahe di 9% di rebaho i ta un desaroyo mas intensivo ku loke tabata sperá. Sifranan natal ta indiká ku e number di personanan ku a nase a baha di 16 nasementu pa kada 1000 persona pa 13 nasementu pa kada 1000 persona entre 1998 i 2004 . E sifranan natal a keda relativamente stabil entre 2004 i 2012 i esaki a baha bai na 11.2 nasementu pa kada 1000 persona na aña 2016.

Segun rapòrtnan ta indiká tin diferente motibu pa kousanan di fertilidat ku ta baha na un pais. Esakinan por ta dor di faktornan biológiko, sikológiko, sosial, ekonómiko, kultural, i tambe faktornan polítiko. Ya komo ta konosí kaba e kantidat di muchanan ku ta bahando tin efekto kaba riba kantidat di edifisio di skol ku mester keda desaroyá aki na Kòrsou. Minister Sithrey van Heydoorn a duna di konosé anteriormente ku e echo ku kantidat di alumno ta baha ta desaroyo kaminda na su opinion adultonan a bira mas konsiente pa ku nasementu di yu i tambe e echo ku hopi hende a imigrá.

Rapòrtnan ta indiká ku en bèrdat tin un kambio históriko den kual hende muhé ta hañando ménos yu. Sifra di fertilidat ta mustra ku e kantidat di mucha pa kada un mama a baha di 5 yu na aña 1950 na 2 yu na aña 1980.  Sifra di fertilidat tabata 2 yu na aña 2014 i a baha na pa 1.74 mucha pa kada un mama na aña 2016. Otro faktornan ku a kontribuí na ménos fertilidat ta imigrashon di hende muhé stranhero na pais Kòrsou ku sifranan di fertilidat mas abou. Ku hopi hende muhé ta mas aktivo den e merkado laboral tambe un faktor ku ta kontribuí na ménos yunan ku ta nanse.

Un di e posibel faktornan ku por a kontribuí na e disminushon di fertilidat na Kòrsou den añanan 2014, 2015, i 2016 ta pa motibunan di faktornan biológiko. Esaki ta entre otro e brote di dos epidemia di malesa ku ta ser transmití un despues di otro den e periodo di 2014-2016, e epidemia di Chikungunya di 2014/2015 i e epidemia di Zika di 2016. Segun sifranan di ministerio GMN tabatin 20.000 persona ku a keda afektá ku Chikungunya den aña 2014. Nuebe luna despues di e epidemia di Chikungunya a nota ku e kantidat di personanan ku ta nanse a baha.

Na ana 2015 e kantidat di yunan ku ta nanse a subi pero no ta kompletamentu sigur ku ta pa motibu di  Chikungunya hende muhé a stòp di haña yu ya komo otro desishonnan tambe por a hunga un ròl. Si data ta duna di konosé ku tabatin un disminushon den e periodo aki. Pa loke ta trata e epidemia di Zika, den aña 2016 tambe e kantidat di yunan ku a nanse a baha ya komo e notisia a yega Kòrsou ku e por afektá e salú di un baby resien nasé. Pues segun rapòrtnan parehanan tabata mas kuidadoso ku reprodukshon.

Segun statistik di CBS ta ferwagt ku e kantidat di personanan ku ta nanse lo baha den futuro.