Otrobanda- eks promé minister Gerrit Schotte a enfatisá ku e kousante mas grandi tabata e kambio di desishon pa bai Otrobanda.

Otrobanda— Ayera un dia mas a bai pèrdí durante e proseso di enkuesta parlamentario. Parlamentarionan enkuestadó, ayera tabata dirigí mas bien pa stèmpel iregularidatnan polítiko en bes di trata na buska kontestanan spesífiko kuantu plaka a gasta robes i ken tabata responsabel pa esakinan.

Vigilante a trata na kuminsá buska algun informashon pa trese aklarashon, prinsipalmente riba e pregunta na unda e 200 mion florin èkstra a bai i dikon mester di 200 mion èkstra pa kaba e hospital.   Segun e kalkulashonnan ta trata di por lo ménos 175 mion èkstra por keda repartí den 3 parti: Kambio di alokashon: 90 mion, Impuesto: 23.4 mion, Transishon den 2 aña en bes di den 4 aña komo konsekuensia di e disputa entre SONA i USONA;  i ampliamentu di e servisionan médiko, kompra di ampliamentu etc, etc: 61.6 mion. Despues tabatin mester di 25 mion florin mas pa diferente pagonan no plania, entre nan kapital sirkulante, kual a kondusí na 200 mion florin.

Te ku awe, pueblo di Kòrsou nunka mas no a logra risibi e spesifikashonnan. Kòrda ku esakinan tabata di  kalkulashonnan. Tur sifranan definitivo mester a keda kontrolá pa accountant i pa Kontrolaria General. Manera menshoná, 25 mion tabata pa kapital di trabou pa HNO-Exploitaite Maatschappij CMC. Tur esaki nan pa motibu di desishon nan ku a keda tuma den pasado (na aña 2013 e MOU i na aña 2016/2017 e paro di proseso di transishon)

Asina pues un suma di 200 mion florin èkstra bai pa konstrukshon di hospital nobo. Ayera por a nota ku enkuestadónan parlamentario tabata hiba e problema mas serka durante e maneho di Promé Ministernan Ben Whiteman i Ivar Asjes, kual ámbos na e momentonan aki ta keda kuestioná riba e kambio den desishon pa bai Otrobanda. Pero e kambio pa bai Otrobanda tabatin mas aspekto tambe.

Ta usando e struktura di Vastgoed Maatschappij (Kompania di Edifisio) i Exploitatie Maatschappij (Kompania pa trabounan di hospital) debí ku a keda palabrá den e MOU di 2013 entre Gobièrnu / SONA i SEHOS, esta ku na momentu ku e proyekto ta kla,  SONA, lo bini un struktura nobo ku  ta konsistí  di 2 kompania, Vastgoed  Maatschappij (Kompania di Edifiso) i Exploitatie Maatschappij (Kompania pa Trabounan di hospital) ku lo ta responsabel pa operashon di e hospital nobo. Den e MOU a keda palabra tambe ku ta SEHOS lo bai operá e hospital nobo, esaki ku tempu a kambia pa e simpel motibu ku ke profeshonalisá e maneho di e hospital. E 2 entidatnan (Vastgoed/Edifisio i Exploitatie/Trabou) ta for di un punto di bista di maneho “governance” kaminda e responsabilidat pa mantené e edifisio i ekiponan médiko ta keda separá for di e entidat ku ta duna kuido na e pashèntnan.

Den e struktura aki i esun di e proyekto, mester kuestioná severamente e maneho na SONA despues di a tuma e fiansa ku gobièrnu a hasi i kuminsá paga Berenshot-Ballast Nijdam Internashonal simplemente “pa loko” durante un periodo largu . E pagonan “pa loko” a bin resultá den e kasonan sivil entre 2016 pa 2019.

A keda kumbiní ku e Vastgoed Maatschappij (Kompania di Edifisio) ta tuma over un parti di e debe di Hulanda for di Gobièrnu ku ta 342,5  mion pa desaroyo di e hospital i otro gastunan rondó di esei. Vastgoed no por tuma tur e debe over di Gobièrnu ku ta 421.8 mion dor ku no ta tur a gastunan hasi ta relatá nan e hospital komo tal. Gastunan manera esun pa kumpra di Colon (18 mion); kambio na Hamelbergweg (11.4 mion), bashamentu abou di edifisio i schuifplan SEHOS (14 mion);  retraso i claim di BNI (37 mion) i gastunan hurídiko i adishonal a konsekuensia di claim (10 mion) , gastunan adishonal di project management i di e operashon di Sona, tur ta gastunan (total 90 mion) ku ta konsekuensia di desishonnan polítiko. Ademas Vastgoed ku mester a fia 175 mion, adishonal sin e kapital sirkulante.

Mester bai bek den atministrashon i yama tenedónan di buki na SONA i tambe na Departamentu di Finansas Públiko Nashonal ku di nan parti tampoko no tabata ehersé kontrol riba SONA i di otro banda SONA riba Berenschot i Ballast Nedam International.