Direktiva di VAE a kompartí ku no ta kontentu ku resultado di e wèlga pero ku lo keda para riba e 10 florin i lo sigui tuma mas akshon.

Willemstad, — Dia 23 novèmber último, direktiva di Vereniging Apothekerseigenaren (VAE) a tene un reda di prensa pa asina kontesta preguntanan despues di dia di wèlga.

Jonathan Middelhof, miembro di direktiva di VAE a kompartí ku e direktiva no ta kontentu ku e resultado di e wèlga, pero ku no ke perhudiká pueblo pa no duna nan remedi. A mira ku CMC no por atendé ku tur pashènt ku mester di resèpt pues no a keda nada otro ku yuda pueblo i tambe kasonan urgente ku ta presentá anochi. Jonathan Middelhof a kompartí ku lo keda tuma akshon si, i e akshon siguiente despues di e wèlga ta ku lo bai tene botikanan di Kòrsou habri di 1or di mèrdia te ku 7or di anochi. Jonathan Middelhof a menshoná ku esaki ta pa evitá ku ta tuma un akshon muchu ekstremista.

Bram Niessink, presidente di Vereniging Apothekerseigenaren (VAE) a duna di konosé ku botikanan di Kòrsou huntu ku e direktiva di VAE ta keda para tras di nan mishon pa asina por haña e oumento di 10 florin pa rekompensa di resèpt  en bes di e 7 florin ku e ta aktualmente. Promé ku e wèlga e direktiva a prepará nan mes pa esaki i a uni ku personal i a tende i tuma konseho. Jonathan Middelhof  a duna di konosé si ku promé ku a hasi e wèlga no a drenta den kontakto ku CMC promé ku a kompartí ku pashèntnan di urgensia por tuma remedi na CMC.  

Bram Niessink  kier a akordá ku e direktiva di VAE su intenshon no ta pa keda envolví den atake personal di ministernan pero ku ke keda tene un diálogo di rèspèt entre e direktiva di VAE i tambe minister. Bram Niessink  kier a akordá ku botikarionan a traha durante di preshon e último añanan i tambe durante periodo di Covid asta ora dòkternan di kas mes tabata será. Ku esaki Bram Niessink  a duna di konosé ku lokual e botikanan di Kòrsou ta pidi no ta algu inlógiko òf inhustu ya komo tur kaminda preisnan a subi.

Botikanan a disidí di habri porta, pero lo sigui deliberá huntu ku e trahadónan di botika pa bini ku diferente proposishon ku lo keda impliká for di 1or.