Playa Piskadó– Ya pa hopi tempu kaba tin un situashon di atenshon pa loke ta trata fluho di tráfiko di vehíkulo motorisá ku ta bai i sali for di Playa Piskadó na Wèspùnt. Ta trata aki di un área hopi chikí ku no por karga  vehíkulo motorisá, prinsipalmente outo, pikòp i van kual na hopi okashon ta kondusí tambe na stashonamentu di vehíkulonan di forma iresponsabel opstakulisando i kongestionando kompletamente e fluho di tráfiko na e sitio.

Banda di esei ta bini aserka e tráfiko di konvoinan grandi di diferente tour operators ku ta bai te abou na e playa pa baha nan klientenan serka di laman. E situashon di tráfiko aki ta pone ku piskadónan mes òf nan klientenan no por yega na e playa i esaki no ta aseptabel pasombra Playa Piskadó ta un playa netamente pa  piskadó no opstante otro desaroyonan ku ta tumando lugá. Esaki a kondusí e Ministerio di GMN pa buska un solushon di manera ku e playa ta keda mantené su karakterístika i destinashon prinsipal kual ta un playa di i pa piskadó. E fluho di tráfiko mester bira mas safe i mester tin espasio pa ambulans òf polis por pasa na momentu ku esaki ta nesesario.

Segun un investigashon ku Ministerio di GMN ta hasiendo a sali afó ku e fluho di tráfiko na Playa Piskadó no ta safe i ta trese hopi opstákulo pa e piskadónan. P’esei ta bini ku un periodo di prueba pa atendé ku e situashon i ta urgi tur bishitante i tour operator pa stashoná vehíkulonan motorisá inklusive e konvoinan  parti ariba dilanti di e misa. E hende ku ta deseá por baha bai playa via e trapi ku tin na e sitio.  Ta bai tin 2 bewaker na entrada prinsipal di e playa ku mester sòru pa esaki sosodé i laga únikamente vehíkulonan di personanan ku ta laborá na e sitio i di piskadónan i nan klientenan pasa bai abou. Ministerio di GMN ta pidi diskulpa pa kualke inkumbiniensia ku e medida nobo aki por trese kuné pa atendé ku tráfiko na Playa Piskadó.