WILLEMSTAD- Minister di Desaroyo Ekonómiko, Ruisandro Cijntje, ta sumamente kontentu ku e trabounan pa yega na kombustibel di mihó kalidat a yega na nan kulminashon. E promé flota di kombustibel segun e spesifikashonnan nobo, konforme rekomendashonnan for di e investigashon di SGS Inspire, ku a wòrdu aprobá pa Konseho di Minister dia 23 di ougùstùs a yega Kòrsou.

https://www.facebook.com/VigilanteKorsou/videos/264104126099999

(Klik pa entrevista riba kalidat)

E tankero Schwyz a hasi entrega di Ultra Low Sulfur Diesel (1 di desèmber) i Mogas(11 di desèmber) ku Curoil a kumpra pa medio di e proseso di destaho (bidding). Despues di a hasi e preparashonnan nesesario Curoil ta kla pa start ku e periodo di transishon pa asina komunidat di Kòrsou por kuminsá risibí e kombustibel segun e spesifikashonnan nobo aki.

Un biaha mas Minister Cijntje ta gradisí kada stakeholder, Curaçao Car Dealer Association (CCDA), Curaçao HeavyEquipment Asociation (CHEA), Sindikato Transporte Uni (STU) ku ta representá transporte públiko: taxi, bùsnan di skol, ets), representantenan di pòmpnan di gasolin (entre otro: Asogas, COPDA i Vanddis), Curoil, e provedor eksklusivo di Mogas i LSD na Kòrsou, Bureau Telecommunicatie & Post (BT&P), e reguladó, Ministerio pa Salubridat Medio Ambiente i Naturalesa (GMN) i Ministerio di Desaroyo Ekonómiko (MEO) ku a hunga un ròl importante den e trabounan pa yega na kombustibel di mihó kalidat pa nos komunidat. Den mesun rosea Minister ta gradisí komunidat pa nan pasenshi pa a spera e momentu grandi aki.

Awor e trabounan pa monitor i kontrolá e proseso i kalidat di kombustibel i e desaroyonan pa lokual ta trata kombustibel lo kontinuá den e periodo di transishon ku ta bai kuminsá. Manera informá anteriormente, lo dura mas òf ménos 2 luna pa e konsumidó di e produkto di Mogas risibí kombustibel pa 100% segun spesifikashon nobo. Pa ku ULSD esaki lo ta alrededor di 4 luna debí ku aki e bahada di suafel ta mas tantu.

Tantu Minister Cijntje, komo Curoil i BTP lo sigui mantené komunidat informá den e periodo benidero. Entrante awor e rapòrtnan di kalidat ta disponibel pa tantu Mogas komo ULSD riba e website di Curoil.