AMSTERDAM—PostNL a post mas pakete den terser kuartal 2023 kompará ku 2022 pero esaki no tabata sufisiente pa kompensá e oumento di gastunan.

Gastunan di energia i oumento di salarionan a afekta e resultadonan. Ku e kantidat di paketenan a oumentá ta bini prinsipalmente di klientenan internashonal. Pero e merkado internashonal ta ménos lukrativo pa e kompania ku merkado lokal. Den Hulanda PostNL a konstatá ku konsumidónan ta gasta menos online; e volumen lokal di paketenan a baha kompará ku 2022. Den segundo kuartal PostNL a meldu mas volumen i rendimentu, pero e desaroyo no a sigui den terser kuartal. Den periodo di yüli pa sèptember PostNL tabatin un pèrdida di 11 mion euro, kompará ku ganashi di 12 mion den 2022. Por lo general e kompania ta papia di un kuartal duru. E kantidat di post ta keda baha, di 390 mion den terser kuartal 2022 pa 356 mion den 2023. Mas aleu, e kompania ta keda konfrontá ku hopi apsentismo pa motibu di malesa, okashoná pa merkado laboral krap. Tin hopi vakatura habrí. Tòg e kompania ta spera di por traha riba kapasidat kompleto den desèmber.