Aqualectra: sistema di alerta no ta dunando sufisiente tempu pa reakshoná.

MUNDO NOBO– E problema di Aqualectra ta un problema entre “hardware i software”. Un sistema ku no ta dunando alertá di problema na tempu, ta difikultando téknikonan na e kompania di utilidat di reakshoná na tempu. Manera Vigilante a publiká ayera, e sistema di monitoria problema na Aqualectra ta funshoná, pero e no ta dunando sufisiente tempu pa “reakshoná”.

Djamars último, algu similar a tuma lugá. Un problema ku a inisiá den e stashon di Aqualectra na Mundo Nobo, a okashoná un problema serio ku elektrisidat na Kòrsou, okashonando un “black out” Kòrsou ku a dura te lat den oranan di anochi. I no ta promé biaha e kompania ta konfrontando problema. E problemanan tabata asina grandi, ku Gobièrnu di Kòrsou a pensa di retirá eks direktor Darick Jonis, kende riba su mes inisiativa a opta pa baha.

Pero ku Darick afó, ainda Neysa Schoop Isenia ta konfrontando problema i no tin nada di haber ku nan maneho, sino un problema tékniko entre lokual ta e struktura logístiko komputerisá kombiná ku e struktura físiko. Segun deklarashon di Ray Seferina, Mènedjer di Fasilidat na Aqualectra, normal si ta bon, riba ret di Aqualectra mester tin un sistema di alerta pa notifiká posibel problema ku por okashoná intrankilidat. Segun Seferina, e sistema di alerta a funshoná debidamente. “Pero e la tira tur kos abou den 7 minüt”. Segun Seferina e sistema no a duna téknikonan chèns pa reakshoná na tempu pa por a logra wak kiko tabata e problema. Tampoko no tabatin oportunidat pa reakshoná manual riba e sistema, Seferina a splika ayera. Anke ku e ret di Aqualectra ta sigurá den sekshon, si e problema ta den un área esensial e ta de-stabilisá e struktura logístiko di distribushon (grid).

E problemanan di djaluna último a sosodé pasobra téknikonan na Aqualectra a identifiká e problema, pero no tabatin sufisiente tempu pa por reakshoná, kousando un black out. Segun Seferina e sistema a kai fo’i otro apénas 7 minüt despues di e alerta. Tabata un problema na e stashon di Mundo Nobo unda e problemanan a inisiá. Pues ta trata di un problema ku e firmware, esta un problema di alerta na tempu ku ta funshoná komo indikadó entre e software i hardware riba e sistema di ret na Aqualectra,

Durante lunanan di Mei pa Yüli, Aqualectra tabatin otro problema ku no tabata unu netamente tékniko sino mas bien di e temperatura haltu na Kòrsou. Konsekuensia di e kalor ta ku e demanda ta subi na nivelnan ku no ta usual pa e temporada. Por ehèmpel, dia promé di yüni a registrá un pik di 126.3MW. Esaki kompará ku e pik mas haltu di último 5 añanan, kual tabata 137.8, ta un demanda ku no ta masha leu den término di produkshon. Prinsipalmente si tene na kuenta ku den e último 5 añanan pa luna di mei i yüni e demanda máksimo normalmente tabata entre 115 pa 120 MW.

Un otro problema tabata esun di mantenshon. Tabatin unidatnan wardando piesa pa por remplasá esnan aktual i despues pone nan disponibel pa por produsí koriente. Aqualectra a pidi asistensia di ekspértonan di Wartsilla, MAN Diesel i Power Plant Solutions pa por traha riba e unidatnan den mantenshon. Un otro problema tabata esun ku Aqualectra ta usa e turbina di gas komo e unidat di respaldo i emergensia. Debí na esaki i tambe e echo ku e unidat ta unu ku ta produsí koriente mas karu ku e otronan, e unidat aki ta mas tantu pará ‘standby’ ku den uso. Na momentu ku a poné den uso, a nota algun fayo tékniko na e unidat, di moda ku mester a para esaki na unu di e okashonnan ku tabatin problema den pasado.