Den e programa B’a Konfia riba Facebook ta trata diferente tópikonan relatá na salubridat seksual i transmishon di malesanan seksual.

Willemstad, — E programa B’a Konfia? ta un proyekto di organisashon Fundashon Plons Kòrsou i ta trese diálogo riba e parti di salubridat seksual i tambe entre otromalesanan seksual.

Ministerio di GMN huntu ku otro organisashonnan ta traha konhunto pa asina trese mas konsientisashon di salubridat seksual i tambe transmishon di malesanan seksual. Den kuadro di esaki, Fundashon Plons Korsou, un di e organisashonnan ku a bini ku un proyekto, ta tene diálogonan riba salubridat seksual i tambe transmishon di malesanan seksual den e programa B’a Konfia?. E programa a keda publiká riba Facebook i awor ta na e di tres episodio. Den e di tres episodio a kombersá ku tres eksperto ku ta dil ku hende nan ku a bai riba aventura.

Dòkter Natasha Hoeve, oradó di e di tres episodio di e programa B’a Konfia?, a menshoná ku a nota un diferensha den e personanan ku ta bini konsulta. Dòkter Natasha Hoeve a elaborá ku tin personanan ku ta habrí pa papia i puntra tokante un malesa i tin otro personanan ku ke sa si nan tin algu, pero tòg tin un tiki bèrgwensa òf ta papia na un manera vago. Dòkter Natasha Hoeve a bisa ku diálogo tokante di sèks huntu ku e pashènt ta hopi importante pa asina por hasi e chekeonan regular.

Juri Wout, trahadó sosial di Famia Planiá a menshoná ku e fundashon ta enfoká mas tantu riba e parti di prevenshon. Juri a menshoná ku e ta ripara ku mas tantu hóben ta aserká e fundashon, i ku e hóbennan ta sinti nan privasidat i ta bini ku basta konfiansa seka e fundashon. Juri di Famia Planiá a bisa si ku tòg no ta haña ku tin masha aserkamentu di parti di hóben i tampoko regularmente pa hasi chekeo. Juri a sigui elaborá ku tòg ta sinti ku tin un tabú pa ku e parti di hasi chekeo. Lokual ku ta purba hasi si, ta bai skolnan pa asina kompartí informashon di transmishon di malesanan seksual. Pero e aserkamentu di hóben ta algu ku ta kambia konstantemente.

Athalia Alberto, enfermera, a menshoná ku komo zùster ta siña ku tin diferente patronchi den kual ta evaluá diferente aspekto di un persona su kurpa ku por mustra ku tin algu robes kuné por ehèmpel drumimentu, baimentu af, uriná i komementu. Tur esakinan ta kosnan fásil pa aserká dòkter kuné pero den esaki tambe tin aspektonan di seksualidat kual segun Athalia Alberto, tin un tabú rondó di dje. Segun Athalia Alberto, esaki ta krea un situashon ferfelu pasombra si no papia tokante di esaki i no ke papia tokante di aspekto di seksualidat, ta unda lo por bai ku e pregunta pa solushoná e problema.