TILBURG—E fase di eksperimento ku mariwana ta start dia 15 desèmber próksimo, segun desishon di gabinete.

For di medio desember dos kultivado di kanabis por entregá mariwana legalmente na coffeeshops na Tilburg i Breda. Minister demishonario Kuipers (Salubridat) a anunsia anteriormente ku e fase di komienso lo start ku tres kultivadó pero unu no a keda kla. Pa mantene sosten pa e eksperimento, a tuma desishon pa desvia di e kondishon ku ta minimo tres kultivadó mester ta kla segun Kuipers i su kolega Yesilgoz (Hustisia) den un karta na Tweede Kamer. Ku e eksperimento gabinete kier evakua si legalisashon ta posibel. Den e prueba lo investigá kiko e konsekuensianan ta pa salubridat i kriminalidat. E proveedornan por entregá mariwana solamente na coffeeshops. Pero den e maneho di transishon nan por bende produktonan di proveedornan bieu. E siguiente dos kultivadonan por start ku entrega legal den febrüari. E 10 kultivadonan ku ta partisipá na e eksperimento a keda selektá fin di 2020 mediante loting pero e eksperimento a keda pospone dos biaha.

Esaki pa motibu di problemanan pa haña permit di munisipionan i habri kuentanan bankario. E ministernan ta tene na e promesa pa denter di 6 luna start ku e eksperimento i amplia entrega na munisipionan partisipante. No ta konosi si tur ta kla. Algun no a kuminsa mes ku e lokalidat pa kultivo. E maneho di supstanshannan  ta inkluí den mayoria programa di elekshon, pues ta un tema pa elekshonnan di Tweede Kamer dia 22 novèmber. Asina VVD i BBB kier warda e eksperimento pa un posishon definitivo riba maneho di droga. CDA ku CU ta bisa ku e coffeeshops mester keda ilegal. ChristenUnie kier stòp e eksperimento i sera tur e establesimentunan. Di otro banda tin partidonan ku ta pro pa legalisá e produkshon, benta i uso. Ta trata di Groenlinks-PvdA, PvdD, Volt i FvD. SP, PvdA i CDA ta boga pa belasting riba hash i benta di droga soft.