Segun promé minister Gilmar Pisas aña pasá e Gobièrnu aki a logra pa subi e sueldo mínimo despues di hopi aña ku esaki no a tuma lugá.

Willemstad,– Durante di su diskurso ayera na okashon di konmemorashon di 30 di mei, promé minister Gilmar Pisas a bisa ku manera ya a bira un kustumber, tur aña di nobo ta bin huntu pa konmemorá e fecha 30 di mei.

El a splika ku ta un fecha ku ta referí na un wèlga di trahadónan di e Refineria Petrolero di Shell riba 30 di mei 1969 aki na Kòrsou.

Un wèlga ku a tipifiká un lucha di algun trahadó ku kier a demostrá ku nan ta sali huntu na vanguardia di nan interesnan laboral.

Gabinete Pisas II ta sigui tur dia den lucha pa traha riba un desaroyo positivo di nos ekonomia ku e meta pa krea un mihó bienestar pa nos komunidat.

Nos atenshon ta keda fihá riba e nesesidat i bienestar nan di nos Pueblo.

Esaki debí ku e meta prinsipal di Gabinete Pisas II ta:

1.Pa krea mas tantu kupo di trabou posibel, pa asina nos hende nan por tin un kalidat di bida haltu;

2.Pa tur suidadano por desaroyá e parti spiritual, mental, físiko i kultural;

3.I fasilitá tambe e siudadano, empresa i organisashonnan pa por produsí pa nan mes i pa Pais Kòrsou, sosteniendo semper esnan ku mester di mas ayudo.

Promé minister ta sigui splika ku tin diferente lucha ku nos tin di hiba pa por logra e metanan aki.

“Nos ta konfrontando entre otro un subida drástiko di preis riba konsumo i komestibelnan, kaminda no tin oumento di suèldunan gradualmente. E efektonan aki ta unu ku ta afektando rònt mundu i hopi tin di haber ku entre otro e guera ku ta kontinuando entre Ukraína i Rusia.

Apesar di esaki e Gobièrnu aktual ta buskando tur manera pa mitigá e kresementu aki di preisnan mas tantu ku ta posibel” asina Gilmar Pisas ta splika. “Nos ke trese i krea un alivio pa nos hendenan”.

Aña pasá e Gobièrnu aki a logra pa subi e sueldo mínimo despues di hopi aña ku esaki no a tuma lugá.

Ainda nos no a yega kaminda nos ta deseá i lo sigui ku e lucha pa yega na un sueldo mínimo ku por kumpli ku e nesesidatnan básiko di kada famia den nos komunidat.

Apesar ku Refineria ta será nos ta buskando tanten otro pilarnan ku por krea mas entrada i kupo di trabou.

E sektor di Turismo i Horeca ta dos ehèmpel klave i ta yudando den e kresementu positivo di nos ekonomia.

E ta sigui bisa ku esaki ta importante pa nos motivá i inspirá nos mes hendenan, ku no tin un trabou, pa okupá e kuponan di trabou aki, sino nos tin di buska hendenan for di eksterior pa hasi esaki.