Alexandra van Huffelen

PUNDA—Sekretario di Estado Alexandra van Huffelen den un karta riba 9 òktober dirigí na e di dos Kámara di Parlamento Hulandes, a informá parlamento di a presentá un opshon nobo pa Kòrsou por paga 911 mion florin di fiansa. Ta trata di e fiansa pa kubri gastunan okashoná pa Covid, durante periodo 2020 pa 2022.

Van Huffelen den su karta ta splika Parlamento di Hulanda, ku tin un oferta nobo riba mesa, despues ku Kòrsou a rechasá e posibilidat kombiná di un fiansa di 1.2 miar florin, pa salba Ennia Caribe Holding i alabes repago di 911 mion na fiansa pa Covid. E oferta nobo di van Huffelen, ta pa Kòrsou paga Hulanda e sèn bek durante 1 aña riba 5.1% na kota di interes. Segun van Huffelen Kòrsou tin tempu pa pensa miéntras nan ta pagando.

E proposishon di van Huffelen ta un ofensa kontra di inteligensha di Kòrsou. Na promé lugá, riba merkado di kapital Hulanda no tin niun fiansa emití na 5.1%. Fiansanan emití riba bono no ta surpasando 3.6% miéntras refinansiamentunan di fiansanan studiantil ta ménos ku 2.5%. Ta un sorpresa grandi pa mira kon van Huffelen su karta a menshoná 5.1%. Segun van Huffelen e konstelashon di e proposishon nobo tabata pasobra e parti di Ennia a bin kai afó. E sekretario tabata ke pa Kòrsou, St. Maarten i Aruba firma e akuerdonan di fiansa.

Aparte di un kota di interes apsurdo, Hulanda ta mustra di kier forsa pa tuma e fiansa di 1.2 miar pa solushoná e debakel di Ennia i evitá un derame di problema sosial si akaso e balornan di penshun mester baha na 80% of ménos. Hulanda, ta mustra klaramente di tin miedu pa e problemanan sosial okashoná pa Ennia, no mester resultá den emigrashon di míles di penshonado pa Hulanda, unda e kategoria di sosten sosial ta riba 1.000 Euro mensual. E posibilidat di emigrashon pa Hulanda, pos kosta e presupuesto hulandes entre 80 pa 120 mion Euro anual na pagonan di prima di sosten sosial (uitkering).

Sin Ennia, segun van Huffelen, no tin mas alternativa sino di ofresé Kòrsou repago di 911 mion florin den 1 aña pa por paga lokual a fia pa Covid. Sin konta anuidat di interes na 5.1 %, 911 mion florin anual ta nifiká un kapasidat di pago na 75 mion florin mensual. Un kota di repago imposibel pa kumpli kuné. Na promé lugá, Kòrsou ta kobra pro medio 125  mion florin mensual na entrada (impuesto, importashon, prima). Si for di 125 mion (pro medio), mester kita 75 mion florin ta keda 50 mion florin. Gastunan salarial di ámtenar inkluso paketenan di seguro ta 30 mion florin mensual of mas. Ta keda 20 mion florin, pa Ministerio di Finansas por manehá Kòrsou. Imposibel.