Resientemente  a lanta e organisashon hudisial PATH  ku tei pa salbaguardiá trafikashon di hende i tambe komersio di persona den nos komunidat.

Willemstad—Resientemente, Minister di Hustisia mr.Shalten Hato a tuma nota den un matutino lokal, e tópiko di prostitushon ilegal ku ta sosodé riba nos isla. Den kuadro di esaki, komo Minister di Hustisia, ta importante pa señalá ku trabounan ta keda hasi den forma diario, riba diferente tereno pa atendé ku prostitushon ilegal i trafikashon di hende riba nos isla.

Resientemente, den Ministerio di Hustisia a lanta e organisashon hudisial PATH (Prevenshon di Abusu i Trafikashon di Hende), ku tei pa salbaguardiá trafikashon di hende i tambe komersio di persona den nos komunidat. Debí na problemanan den paisnan bisiña, un kantidat di persona ta sali for di nan pais, di forma legal atrabes di avion, na unda nan ta ingresá nos pais komo turista òf komo persona ku a bini pa laborá, pero ku despues ta ser usa den e mundu di trafikashon. E personanan aki, ku no tur bes ta na altura di tur detaye, ta yega nos pais ku e speransa di por traha i yuda nan famia ku a keda den eksterior. Pero ta konfrontá ku den mayoria kaso hendenan, ku ta hasi uso di netamente e nesesidat di e persona aki, pa laga nan kometé aktonan ilegal riba nos isla. 

Komo Minister di Hustisia mi mester indiká ku prostitushon ilegal ta hasi daño na nos komunidat na diferente forma. Komo Minister di Hustisia, mi no por aprobá e stigmatisashon aki kontra di un grupito di hende, paso tin diferente investigashon hasí den nos komunidat, na unda rapòrtnan a keda presentá, ku e hendenan aki ta bini nos isla tambe pa traha den diferente área laboral i no nesesariamente den esnan ku índole ilegal. Mas aleu, sierto indikashon òf sospecho di trafikashon di hende riba nos isla, mester keda denunsiá mesora na outoridatnan polisial, ku den un tim multidisiplinario pero tambe riba tereno individual, ta aktua den diferente kaso riba nos isla. Outoridatnan polisial ta ehersé un trabou profundo den investigashonnan riba tipo di kasonan aki, i sa ehersé tambe detenshonnan tantu na nivel lokal i internashonal den kuadro di trafikashon di hende i komersio di persona. 

Komo Ministerio di Hustisia, nos a bini ta traha duru pa salbaguardiá derechinan humano di kada siudadano den nos pais, i ta trata tambe di duna e atenshon na kada situashon individual di kada siudadano den nos pais. Komo parti integral di maneho di Minister di Hustisia, mi por enfatisá ku e atenshon tei di forma debido den mi maneho diario i den maneho di Kuerpo Polisial Kòrsou, ku e HATO-tim ku tei pa kontra arestá e tipo di práktikanan aki den nos komunidat.